ରୁକୁଣା ରଥ ନିର୍ମାଣରେ ବିଭ୍ରାଟ

ଭୁବନେଶ୍ୱର (ବଡ଼ ଖବର ବ୍ୟୁରୋ): ପ୍ରଶାସନିକ ଅବହେଳାରୁ ଲିଙ୍ଗରାଜ ରଥ ନିର୍ମାଣରେ ବିଭ୍ରାଟ । ଆସନ୍ତା ୨୯ ତାରିଖରେ ଅଶୋକାଷ୍ଟମୀ । ପ୍ରଭୁ ଶ୍ରୀ ଲିଙ୍ଗରାଜଙ୍କ ପବିତ୍ର ରଥଯାତ୍ରାକୁ ରହିଲା ଆଉ ମାତ୍ର ୧୦ ଦିନ । ରୁକୁଣା ରଥ ଟଣା ହେବା ନେଇ ଅନିଶ୍ଚିତତା ଲାଗିରହିଛି । ମାତ୍ର ୧୦ ଦିନ ଭିତରେ ରଥକାମ କିପରି ଶେଷ ହେବ ସେଥିପାଇଁ ଭକ୍ତ ଓ ସେବାୟତଙ୍କ ମନରେ ସନେ୍ଦହ ସୃଷ୍ଟି ହୋଇଛି । ନିୟମ ଅନୁସାରେ ଦୋଳ ପୂର୍ଣ୍ଣିମାର ୮ ଦିନ ପୂର୍ବରୁ ରଥ କାମ ଆରମ୍ଭ ହେବା କଥା । ଦୋଳବେଦୀକୁ ଠାକୁର ଗଲା ବେଳେ ରଥ ଦେଖିକି ଯିବାର ପରମ୍ପରା ରହିଆସିଛି ।

ମାତ୍ର ଚଳିତ ବର୍ଷ ଏଥିରେ ବ୍ୟତିକ୍ରମ ପରିଲକ୍ଷିତ ହୋଇଛି । ବର୍ତ୍ତମାନ ସୁଦ୍ଧା ରଥକାଠ ପହଞ୍ଚିପାରୁନି । ରଥର ଚାରିଚକ ତିଆରି ହୋଇସାରିଥିଲେ ବି ଏବେ ଯାଏଁ ଅଖକାଠ ପହଞ୍ଚି ପାରୁନି । ରଥଖଳାରେ ପ୍ରାୟ ୬୫ଜଣ କାରିଗର ଲାଗିଛନ୍ତି । ଗାଁ ମହାରଣା ୧୫ ଜଣ, ପାଳିଆ ୫ଜଣ ଓ ମୁଖ୍ୟ ମିସ୍ତ୍ରୀ ଜଣେ କାମରେ ଲାଗିଛନ୍ତି । ତେନ୍ତୁଳି କାଠରେ ଅଖକାଠ ଦୁଇଟି ପ୍ରସ୍ତୁତ ହୁଏ । ଯାହାକି ଦଶପଲ୍ଲା, ଖଣ୍ଡପଡ଼ା ପାଖରୁ ଆସେ । କିନ୍ତୁ ବର୍ତ୍ତମାନ ସୁଦ୍ଧା କାଠ ପହଞ୍ଚି ନଥିବାରୁ ଶ୍ରୀଲିଙ୍ଗରାଜ ମନ୍ଦିର ପ୍ରଶାସନକୁ ଦାୟୀ କରିଛନ୍ତି ମହାରଣା ସେବାୟତ ଓ ମୁଖ୍ୟ ମିସ୍ତ୍ରୀ ।