ଥରିଲା ଇଣ୍ଡୋନେସିଆ

ନୂଆଦିଲ୍ଲୀ(ବଡ଼ ଖବର ବ୍ୟୁରୋ) : ଇଣ୍ଡୋନେସିଆର ତଲାଉଡ୍ ଦ୍ୱୀପରେ ଶକ୍ତିଶାଳୀ ଭୂମିକମ୍ପ ଝଟକା । ସୋମବାର ବିଳମ୍ବିତ ରାତି ପ୍ରାୟ ୨ଟା ୨୮ ମିନିଟରେ ଏହି ଭୂମିକମ୍ପ ଅନୁଭୂତ ହୋଇଥିବା ନେଇ ନ୍ୟାସନାଲ ସେଣ୍ଟର ଫର୍ ସେସମୋଲୋଜି ପକ୍ଷରୁ ସୂଚନା ଦିଆଯାଇଛି । ରିକ୍ଟର ସ୍କେଲରେ ଏହାର ତୀବ୍ରତା ୬.୭ ରେକର୍ଡ଼ କରାଯାଇଥିବା ବେଳେ ଏହାର କେନ୍ଦ୍ରସ୍ଥଳ ଭୂମିରୁ ୮୦ କିମି ଗଭୀର ରେକର୍ଡ଼ କରାଯାଇଛି । ବର୍ତ୍ତମାନ ସୁଦ୍ଧା କ୍ଷୟକ୍ଷତିର କୌଣସି ସୂଚନା ମିଳିପାରିନାହିଁ । ନୂଆ ବର୍ଷର ପ୍ରାରମ୍ଭରୁ ପ୍ରଥମେ ଜାପାନ ପରେ ମିଆଁମାର, ଆଫଗାନିସ୍ତାନ ଏବଂ ଭାରତରେ ଲଦ୍ଦାଖ ଓ ଆସାମ ଆଦି ବିଭିନ୍ନ ଅଂଚଳରେ ଭୂମିକମ୍ପ ଝଟକା ଅନୁଭୂତ ହୋଇଥିଲା ।

ବର୍ଷ ଆରମ୍ଭରୁ ଜାପାନରେ ବଡ଼ ଭୂକମ୍ପ ହୋଇଥିବାରୁ ବ୍ୟାପକ ସମ୍ପତ୍ତି ନଷ୍ଟ ହେବାସହ କିଛି ଲୋକଙ୍କ ଜୀବନ ଯାଇଥିଲା । ପ୍ରାୟ ୮ ବର୍ଷ ପରେ ଦେଶରେ ବଡ଼ଧରଣ ଭୂମିକମ୍ପ ହୋଇଥିବା ସୂଚନା ଦିଆଯାଇଥିଲା । ସେହି ଭୂମିକମ୍ପରେ ୨ଶହରୁ ଅଧିକ ଲୋକ ନିଖୋଜ ହୋଇଥିଲେ । ୧୦୦ ଜଣଙ୍କ ମୃତ୍ୟୁ ଘଟିଥିଲା । ଜାପାନର ପଶ୍ଚିମ ଉପକୂଳରେ ହୋଇଥିବା ଏହି ଭୂକମ୍ପରେ ହୋକୁରିକୁ ଅଞ୍ଚଳର ୨୩,୦୦୦ ଘର ବିଦ୍ୟୁତ୍ ସଂଯୋଗ ନଷ୍ଟ ହୋଇଥିଲା ।