ବଡ଼ ଖବର ନମ୍ବର ୱାନ: ଆମେ କୃତଜ୍ଞ
ଭୁବନେଶ୍ୱର (ବଡ଼ ଖବର ବ୍ୟୁରୋ): ଧନ୍ୟବାଦ ଓଡ଼ିଶା । ରେଜଲ୍ଟ ଡେରେ ‘ବଡ଼ ଖବର’କୁ ମିଳିଲା ଦର୍ଶକଙ୍କ ସର୍ବାଧିକ ଭଲପାଇବା । ରାଜ୍ୟର ଏକମାତ୍ର ନିରପେକ୍ଷ ଚ୍ୟାନେଲ ‘ବଡ଼ ଖବର’ରେ ନିର୍ବାଚନ ଖବର ଦେଖିବାକୁ ପସନ୍ଦ କଲା ଓଡ଼ିଶା । ପଛରେ ପଡ଼ିଲେ ବଡ଼ ବଡ଼ ଚ୍ୟାନେଲ । ରାଜନୈତିକ ଦଳ, ପୁଞ୍ଜପତିଙ୍କ ଚ୍ୟାନେଲକୁ ପ୍ରତ୍ୟାଖାନ କରି ଲୋକେ ଲୋକଙ୍କ ଚ୍ୟାନେଲ ‘ବଡ଼ ଖବର’ରେ ଦେଖିଲେ ଉପନିର୍ବାଚନର ଫଳ ଓ ବିଶ୍ଳେଷଣ । ଭିୟୁରସିପ୍ ଜାଣିବାକୁ ଏବେ ଟିଆରପି ବା ବାର୍କ ବ୍ୟବସ୍ଥା ନ ଥିବାରୁ ସୋସିଆଲ ମିଡିଆର ଲାଇଭ୍ ଷ୍ଟ୍ରିମିଂ ବଡ଼ ମାଧ୍ୟମ ହୋଇଛି ।
ଆଜି ଦିନ ସାରା ଫେସବୁକର ଲାଇଭଷ୍ଟ୍ରିମିଂରେ ସବୁବେଳେ ସର୍ବାଧିକ ଅନଲାଇନ ଭିୟୁଓର୍ ପାଉଥିଲା ‘ବଡ଼ ଖବର’ । ଯାହା ଦର୍ଶାଉଥିଲା ଲୋକେ କାହା ଏଜେଣ୍ଡା ବା ରଂଗମରା ଖବର ଦେଖିବାକୁ ଚାହୁଁ ନାହାନ୍ତି, ବରଂ ସଚ୍ଚୋଟ ଓ ନିରପେକ୍ଷ ଚ୍ୟାନେଲରୁ ସତ ଓ ସଠିକ୍ ଖବର ଜାଣିବାକୁ ଚାହିଁଛନ୍ତି । ‘ବଡ଼ ଖବର’ ଆରମ୍ଭ ହେବାକୁ ବର୍ଷେ ବି ହୋଇନି ।
ତେବେ କମ୍ ସମୟରେ ଆମେ କେବଳ ଓ କେବଳ ଲୋକଙ୍କ ହିତ ଓ ଠିକ୍ ଖବର ଦେବାର ବ୍ରତୀ ହୋଇଛୁ । କେବେ ବି କାହା ଚାପର ବଶବର୍ତ୍ତୀ ହୋଇନାହୁଁ କି କେବେ ବି ହେବୁ ନାହିଁ । ଆପଣମାନଙ୍କ ସାହାଯ୍ୟରେ ‘ବଡ଼ ଖବର’ ଚ୍ୟାନେଲ ଚାଲୁଛି । ତେଣୁ ଅନ୍ୟ କାହା ଭଳି ମିଛ ଦେଖାଇବାର ନାହିଁ କିମ୍ବା କୌଣସି ରାଜନୈତିକ ଦଳ ଏଜେଣ୍ଟ ଭଳି କାମ କରିବାର ନାହିଁ ।
‘ବଡ଼ ଖବର’ ପ୍ରତି ଲୋକଙ୍କ ଭଲ ପାଇବା ଆମକୁ ଆବେଗମୟ କରିଛି । ଆମେ ବିନମ୍ରତାର ସହ ଆମର ସମସ୍ତ ଦର୍ଶକଙ୍କୁ କୃତଜ୍ଞତା ଜଣାଇବାକୁ ଚାହୁଁଛୁ । ଆପଣଙ୍କ ଆଶୀର୍ବାଦ ‘ବଡ଼ ଖବର’ ପ୍ରତି ଏମିତି ଜାରି ରହିଛି । କଥା ଦେଉଛୁ, କେବେ ବି ଆପଣଙ୍କୁ ନିରାଶ କରିବୁ ନାହିଁ । ନିରପେକ୍ଷତା, ସଠିକ୍ ଓ ଶୀଘ୍ର ଖବର ଦେଖାଇବାର ଏ ଧାରା ଓ ଆପଣଙ୍କ ସହ ଆମର ସଂପର୍କ ଏମିତି ଅତୁଟ ରହିବ ।