![](https://i0.wp.com/badakhabar.in/wp-content/uploads/2020/10/kaniha.jpg?fit=750%2C400&ssl=1)
କଣିହାଁ, (ବଡ଼ ଖବର ବ୍ୟୁରୋ): କଣିହାଁରେ ଦିନକୁ ଦିନ ବଢ଼ିଚାଲିଛି ହାତୀ ଉପଦ୍ରବ । ଆଜି ସକାଳ ସାଢ଼େ ୬ଟାରେ ବଜ୍ରକୋଟ ଗାଁର ମାୟାଧର ବେହେରା (୬୦) ସକାଳେ ନିତ୍ୟକର୍ମ ସାରି କ୍ଷୀର ଆଣିବା ପାଇଁ ଯାଉଥିଲେ । ଏହି ସମୟରେ ଗାଁର ସୁବର୍ଣ୍ଣପୁର ପ୍ରାଥମିକ ବିଦ୍ୟାଳୟ ପରିସରରେ ଏକ ଜଙ୍ଗଲି ଦନ୍ତାହାତୀ ତାଙ୍କ ଛାତିକୁ ଦଳିଦେଇଥିଲା। ଖବରପାଇ ବଜ୍ରକୋଟ ବିଟ୍ ଫରେଷ୍ଟର ଅନୁରାଗ ପରିଡ଼ାଙ୍କ ନେତୃତ୍ୱରେ ବନବିଭାଗ କର୍ମଚାରୀମାନେ ପହଞ୍ଚି ଗୁରୁତର ମାୟାଧରଙ୍କୁ ପ୍ରଥମେ କଣିହାଁ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ଆଣିଥିଲେ। ସେଠାରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ହୋଇଛି। ପାଳଲହଡ଼ା ବିଧାୟକ ମୁକେଶ କୁମାର ପାଳ ତୁରନ୍ତ କ୍ଷତିପୂରଣ ପ୍ରଦାନ କରିବାକୁ କଣିହାଁ ରେଞ୍ଜରଙ୍କୁ ନିର୍ଦ୍ଦେଶ ଦେଇଥିଲେ। ରେଞ୍ଜର ନୀଳମଣି ଦେହୁରୀ ମାୟାଧରଙ୍କ ପରିବାରକୁ ତୁରନ୍ତ ୪୦ ହଜାର ଟଙ୍କାର ଚେକ୍ ପ୍ରଦାନ କରିଛନ୍ତି। ରେଙ୍ଗାଲି ପୋଲିସ ଡାକ୍ତରଖାନରେ ପହଞ୍ଚି ମୃତଦେହ ବ୍ୟବଚ୍ଛେଦ ପାଇଁ ତାଳଚେର ଉପଖଣ୍ଡ ଚିକିତ୍ସାଳୟକୁ ପଠାଇଛି।