ଦାଉ ସାଧିଲା ଋଣ, ଜୀବନ ହାରିଲେ ଚାଷୀ

ବଲାଙ୍ଗିର (ବଡ଼ ଖବର ବ୍ୟୁରୋ): ଚକଡା ଲାଗି ଜୀବନ ହାରିଲେ ଚାଷୀ । ମୃତକ ଚାଷୀ ଜଣକ ହେଲେ ରମେଶ ଭୋଇ । ଏଭଳି ଅଭିଯୋଗ ଆସିଛି ବଲାଙ୍ଗିର ଜିଲ୍ଲା ପୁଇଁତଲା ଥାନା ବୁବେଳ ଗାଁରୁ । ମୃତ ଚାଷୀ ରମେଶ ଭୋଇ । ତାଙ୍କ ୧୦ ଏକର ଜମିରେ ଧାନ ଚାଷ କରିଥିଲେ। ଗୋଟିଏ ପଟେ କ୍ଷେତରେ ପାଣି ଅଭାବ ତ ଅନ୍ୟପଟେ ଚକଡ଼ା ପୋକ ଦାଉ ସାଧିଥିଲା। ଫଳରେ ତାଙ୍କର ପାଞ୍ଚ ଏକର ଧାନ ଫସଲ ସମ୍ପୂର୍ଣ୍ଣ ନଷ୍ଟ ହୋଇ ଯାଇଥିବାର ମୃତ ଚାଷୀଙ୍କ ପରିବାର କହିଛନ୍ତି। ଏପରିକି ମୃତ ଚାଷୀ ରମେଶ ଭୋଇ ଅନେକ ଥର ଚାଷରେ ରୋଗ ପୋକ ମାରିବା ପାଇଁ ଔଷଧ ସିଞ୍ଚନ କରିଥିଲେ। ହେଲେ ଏଥିରେ କିଛି ଲାଭ ମିଳି ନ ଥିଲା। ସେପଟେ ଋଣ ଭାର ଯୋଗୁଁ ସେ ଅନ୍ୟଉପାୟ ନ ପାଇ ଗତକାଲି ନିଜ କ୍ଷେତରେ ବିଷ ପିଇ ଦେଇଥିଲେ।

ତାଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ବଲାଂଗୀର ଭୀମଭୋଇ ମେଡ଼ିକାଲ କଲେଜ ଡ଼ାକ୍ତରଖାନାକୁ ଆଣିଥିଲେ। ହେଲେ ଚିକିତ୍ସାଧୀନ ଅବସ୍ଥାରେ ଆଜି ତାଙ୍କର ମୃତ୍ୟୁ ହୋଇଯାଇଛି। ଏନେଇ ପରିବାର ଲୋକେ ଚାଷ ନଷ୍ଟ ଓ ଋଣ ଭାର ପାଇଁ ଆତ୍ମହତ୍ୟା କରିଥିବାର ଅଭିଯୋଗ ଆଣିଛନ୍ତି। ସେପଟେ ବଲଙ୍ଗିର କୃଷି ବିଭାଗ ଓ ପ୍ରଶାସନ ତଥା ପୁଇଁତଲା ପୋଲିସ ଏହି ଅଭିଯୋଗର ତଦନ୍ତ ଆରମ୍ଭ କରିଛନ୍ତି। ସେପଟେ ଚାଷୀ ଆତ୍ମହତ୍ୟା ଘଟଣାକୁ ଦୁର୍ଭାଗ୍ୟଜନକ ବୋଲି କହିଛନ୍ତି ସ୍ଥାନୀୟ ବିଧାୟକ ମୁକେଶ ମହାଲିଙ୍ଗ । ମୃତ ଚାଷୀଙ୍କ ପରିବାର ଲୋକଙ୍କୁ ୫୦ ଲକ୍ଷ ଟଙ୍କା କ୍ଷତିପୂରଣ ଦେବାକୁ ଦାବି କରିଛନ୍ତି ବିଧାୟକ ମୁକେଶ ମହାଲିଙ୍ଗ ।