ନୂଆଦିଲ୍ଲୀ(ବଡ଼ ଖବର ବ୍ୟୁରେ): ମହିଳାମାନେ ଦୁର୍ବଳା ନୁହଁନ୍ତି । ସେମାନେ ମଧ୍ୟ ପୁରୁଷଙ୍କ ସହ କାନ୍ଧ ମିଳାଇ ଚାଲିପାରନ୍ତି । ପୁରୁଷମାନଙ୍କ ଭଳି ଶତ୍ରୁ ବିରୋଧରେ ଯୁଦ୍ଧ ମଧ୍ୟ କରିପାରନ୍ତି । ଦେଶ ସ୍ୱାଧୀନ ହେବାର ୮ବର୍ଷ ପରେ ଭାରତୀୟ ବାୟୁସେନାରେ ଯୋଗ ଦେଇଥିଲେ ଜଣେ ମହିଳା । ନିଜର ଦକ୍ଷତା ବଳରେ ସେ ଭାରତୀୟ ବାୟୁସେନାର ୱିଙ୍ଗ କମାଣ୍ଡର ହୋଇପାରିଥିଲେ । ସେ ଥିଲେ ଭାରତୀୟ ବାୟୁସେନାର ପ୍ରଥମ ୱିଙ୍ଗ କମାଣ୍ଡର । ଆଜି ତାଙ୍କର ଦେହାନ୍ତ ହୋଇଯାଇଛି । ଆସନ୍ତୁ ଜାଣିବା ତାଙ୍କ ବିଷୟରେ କିଛି ।
ଡକ୍ଟର ବିଜୟଲକ୍ଷ୍ମୀ ରମଣ । ଭାରତୀୟ ବାୟୁସେନାର ଏକ ସ୍ପର୍ଦ୍ଧିତ ନାମ । ୧୯୫୫ ଅଗଷ୍ଟ ୨ରେ ସେ ଭାରତୀୟ ବାୟୁସେନାରେ ଜଣେ ଅଧିକାରୀ ଭାବେ ଯୋଗଦେଇଥିଲେ । ୧୯୬୫ ଓ ୧୯୭୧ର ଭାରତ-ପାକିସ୍ତାନ ଯୁଦ୍ଧରେ ଅପୂର୍ବ ସାହସର ସହ ଶତ୍ରୁ ବିରୋଧରେ ଲଡିଥିଲେ ବିଜୟଲକ୍ଷ୍ମୀ । ନିଜର ଦକ୍ଷତା, ସାହସିକତା ଯୋଗୁ ତାଙ୍କୁ ମିଳିଥିଲା ପଦୋନ୍ନତି । ୧୯୭୨ ଅଗଷ୍ଟ ୨୨ ତାରିଖରେ ବିଜୟଲକ୍ଷ୍ମୀ ଭାରତୀୟ ବାୟୁସେନାର ପ୍ରଥମ ମହିଳା ୱିଙ୍ଗ କମାଣ୍ଡର ଭାବେ ଦାୟିତ୍ୱ ଗ୍ରହଣ କରିଥିଲେ ।
୧୯୭୯ ଫେବୃଆରୀରେ ସେ ସରକାରୀ ଚାକିରିରୁ ଅବସର ନେଇଥିଲେ । ଜଣେ ଦକ୍ଷ ସାମରିକ ବିଶେଷଜ୍ଞ ଭାବେ ତାଙ୍କର ଖ୍ୟାତି ରହିଛି । ରବିବାର ରାତିରେ ତାଙ୍କର ଦେହାନ୍ତ ହୋଇଯାଇଛି । ମୃତ୍ୟୁ ବେଳକୁ ବିଜୟଲକ୍ଷ୍ମୀଙ୍କୁ ୯୬ବର୍ଷ ବୟସ ହୋଇଥିଲା । ଅବସର ପରେ ସେ ତାଙ୍କ ଝିଅଘରେ ରହିଆସୁଥିଲେ । ରାତି ୮.୩୦ରେ ତାଙ୍କର ଦେହାନ୍ତ ହୋଇଥିଲା ।
