ପ୍ରଥମ ଥର ବାଚସ୍ପତି ପଦ ପାଇଁ ହେବ ନିର୍ବାଚନ
ନୂଆଦିଲ୍ଲୀ (ବଡ଼ ଖବର ବ୍ୟୁରୋ): ବାଚସ୍ପତି ପଦ ପାଇଁ ହେବ ନିର୍ବାଚନ। ଆସନ୍ତାକାଲି ନିର୍ବାଚନ ହେବାକୁ ଥିବା ବେଳେ ବିରୋଧୀ ଇଣ୍ଡିଆ ମେଣ୍ଟ ନିଜର ପ୍ରାର୍ଥୀଙ୍କ ନାମ ଘୋଷଣା କରିଛି । ଏନଡିଏ ପକ୍ଷରୁ ପୁଣି ଥରେ ଓମ ବିର୍ଲା ନାମାଙ୍କନ ଭରିଥିବା ବେଳେ ବିରୋଧୀଙ୍କ ପକ୍ଷରୁ କେ ସୁରେଶ ପ୍ରାର୍ଥୀ ହୋଇଛନ୍ତି । ବର୍ତ୍ତମାନ ପର୍ଯ୍ୟନ୍ତ ଉଭୟ ଶାସକ ଏବଂ ବିରୋଧୀଙ୍କ ସର୍ବସମ୍ମତି କ୍ରମେ ବାଚସ୍ପତିଙ୍କୁ ଚୟନ କରାଯାଉଥିଲା । କିନ୍ତୁ ଏଥର ପରମ୍ପରା ଭାଙ୍ଗିବାକୁ ଯାଉଛି ।
ଏହା ପୂର୍ବରୁ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ କଂଗ୍ରେସ ସଭାପତି ମଲ୍ଳିକାର୍ଜୁନ ଖଡ଼ଗେଙ୍କୁ ଫୋନ୍ କରି ସ୍ପିକର ପଦବୀ ପାଇଁ ସମର୍ଥନ ମାଗିଥିଲେ । ସେପଟେ ରାହୁଲ ଗାନ୍ଧୀ କହିଥିଲେ ଯେ, ବିରୋଧୀ ବାଚସ୍ପତି ପୋଷ୍ଟକୁ ସମର୍ଥନ ଦେବାକୁ ରାଜି ଅଛି । ହେଲେ ବିରୋଧୀଙ୍କୁ ଉପବାଚସ୍ପତି ପଦବୀ ମିଳିବା ଦରକାର । ଏହା ଉପରେ ରାଜନାଥ ସିଂହଙ୍କ ପକ୍ଷରୁ କୌଣସି ଜବାବ ମିଳିନଥିଲା । ଏପରିକି ରାଜନାଥ କଲ ବ୍ୟାକ୍ କରିବେ କହି କରିନଥିଲେ ବୋଲି ରାହୁଲ ଅଭିଯୋଗ କରିଥିଲେ । ସେ ଆହୁରି କହିଥିଲେ ଯେ, ଆମ ନେତାଙ୍କୁ ଦୁର୍ବ୍ୟବହାର କରାଯାଉଛି ।
କେ. ସୁରେଶ ୮ ଥର ସାଂସଦ ନିର୍ବାଚିତ ହୋଇଛନ୍ତି । ସେ ୧୯୮୯, ୧୯୯୧, ୧୯୯୬, ୧୯୯୯, ୨୦୦୯, ୨୦୧୪, ୨୦୧୯, ୨୦୨୪ରେ ସାଂସଦ ହୋଇଛନ୍ତି । କେ. ସୁରେଶ କେରଳର ମାବେଲିକ୍କାରା ଆସନରୁ କଂଗ୍ରେସ ସାଂସଦ ଅଛନ୍ତି । ସେ କେନ୍ଦ୍ରମନ୍ତ୍ରୀ ଭାବରେ କାର୍ଯ୍ୟ କରିଛନ୍ତି ।