ନୂଆଦିଲ୍ଲୀ(ବଡ଼ ଖବର ବ୍ୟୁରୋ): କରୋନା ସଂକ୍ରମଣ ବିରୋଧରେ ଲଢ଼େଇ ଜାରି ରହିଥିବା ବେଳେ ଏଲୋପାଥି ଏବଂ ଡାକ୍ତରଙ୍କୁ ନେଇ ବାବା ରାମଦେବଙ୍କ ବୟାନ ଦେଶରେ ବିବାଦ ସୃଷ୍ଟି କରିଛି। ଡାକ୍ତରମାନେ ବାବାଙ୍କୁ ଗିରଫ କରିବାକୁ ଦାବି କରୁଥିବା ବେଳେ ସେ କିନ୍ତୁ ନିଜର ତାଉ ଦେଖାଇବାରେ ବ୍ୟସ୍ତ। ଗୋଟିଏ ପରେ ଗୋଟିଏ ଏଲୋପାଥି ବିରୋଧରେ ପ୍ରଶ୍ନ ବାଣ ମାରିଚାଲିଛନ୍ତି ଯୋଗଗୁରୁ ବାବା ରାମଦେବ। ସେପଟେ ବାବାଙ୍କ ବିବାଦୀୟ ବୟାନକୁ ନେଇ ଏବେ ଫେଡେରସନ୍ ଅଫ ରେସିଡେଣ୍ଟ ଡକ୍ଟର୍ସ ଆସୋସିଏସନ୍ ଇଣ୍ଡିଆ ଖପ୍ପା ହୋଇଛି। ଘରୋଇ ଡାକ୍ତର ସଂଘ ବାବା କ୍ଷମା ମାଗିବା ସହ ମହାମାରୀ ଅଧିନିୟମ ଅନୁସାରେ ତାଙ୍କ ବିରୋଧରେ ଦୃଢ଼ କାର୍ୟ୍ୟାନୁଷ୍ଠାନ ଦାବି କରିଛନ୍ତି। ଏହାକୁ ନେଇ ଜୁନ ପହିଲାରେ କରୋନା ଯୋଦ୍ଧା ଏବଂ ମଡର୍ଣ୍ଣ ମେଡିସିନ୍କୁ ନେଇ ରାମଦେବଙ୍କ ବିବାଦୀୟ ବୟାନକୁ ବିରୋଧ କରି ଦେଶବ୍ୟାପୀ କଳାଦିବସ ପ୍ରଦର୍ଶନ କରିବ ଫୋର୍ଡ଼ା ।
ଏହା ସହ ୧ ଜୁନରେ ରୋଗୀଙ୍କ ସେବା ଜାରି ରହିବ ଏବଂ ଏଥିରେ କୌଣସି ପ୍ରକାର ବାଧା ଉପୁଜିବ ନାହିଁ ବୋଲି ସଂଘ ପକ୍ଷରୁ କୁହାଯାଇଛି। ଏହା ପୂର୍ବରୁ ରାମଦେବଙ୍କ ଏକ ଭିଡିଓ ସହ କେନ୍ଦ୍ରକୁ ଚିଠି ଲେଖିଥିଲା ଭାରତୀୟ ଚିକିତ୍ସକ ସଂଘ। ଭିଡିଓରେ ରାମଦେବ ଏଲୋପାଥି ଔଷଧ ବେକାର ବୋଲି କହିବା ସହ ଲକ୍ଷ ଲକ୍ଷ କରୋନା ରୋଗୀ ଏହି ଔଷଧ ଖାଇ ମରୁଛନ୍ତି ବୋଲି କହିଥିବା ନେଇ ଅଭିଯୋଗ ହୋଇଥିଲା। ଏଥିପାଇଁ ରାମଦେବଙ୍କ ବିରୋଧରେ କଡ଼ା କାର୍ୟ୍ୟାନୁଷ୍ଠାନ ନେବାକୁ ଆଇଏମଏ ଦାବି କରିଥିଲା। ପରେ ବାବା ରାମଦେବ ନିଜର ମନ୍ତବ୍ୟ ଫେରସ୍ତ ନେଇଥିଲେ। ପୁଣି ଗୋଟିଏ ଦିନ ପରେ ଏଲୋପାଥିକୁ ନେଇ ରାମଦେବ ପ୍ରଶ୍ନ କରିବା ଆରମ୍ଭ କରିଥିଲେ। ଏବେ ଏହି ବିବାଦ ଥମିବାର ନାଁ ଧରୁନି।
