କୋଭିଡ଼ ଅନାଥଙ୍କ ପାଇଁ ମୋଦିଙ୍କ ବଡ଼ ଘୋଷଣା

ନୂଆଦିଲ୍ଲୀ(ବଡ଼ ଖବର ବ୍ୟୁରୋ): କରୋନାର ଦ୍ୱିତୀୟ ଲହରରେ ଦେଶରେ ଅନେକ ଲୋକଙ୍କ ମୃତ୍ୟୁ ହୋଇଛି । ଆଉ ଏହାରି ମଧ୍ୟରେ କେନ୍ଦ୍ରରେ ମୋଦି ସରକାରଙ୍କ ଶାସନକାଳର ୭ବର୍ଷ ପୂରଣ ହୋଇଛି । ଏହି ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ନେଇଛନ୍ତି ଏକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି । କରୋନାରେ ସଂକ୍ରମିତ ହୋଇ ଅନେକ ପିଲା ସେମାନଙ୍କ ପିତାମାତାଙ୍କୁ ହରାଇ ଅନାଥ ହୋଇଛନ୍ତି । ତେବେ କରୋନା ଯୋଗୁଁ ଅନାଥ ହୋଇଥିବା ଏହି ପିଲା ମାନଙ୍କ ପାଇଁ କଲ୍ୟାଣମୂଳକ ପଦକ୍ଷେପ ନେଇଛନ୍ତି ପ୍ରଧାନମନ୍ତ୍ରୀ । ଏଥିରେ ଏହି ପିଲାମାନଙ୍କୁ ମାଗଣା ଶିକ୍ଷା ଯୋଗାଇ ଦିଆଯିବା ସହିତ ୧୮ବର୍ଷ ବୟସରେ ପହଞ୍ଚିଲେ ସେମାନଙ୍କୁ ୫ବର୍ଷ ଯାଏ ମାସିକ ଷ୍ଟାଇପେଣ୍ଡ ଦିଆଯିବ ।

ସେହିପରି ୨୩ବର୍ଷ ବୟସରେ ପହଞ୍ଚିଲେ ୧୦ଲକ୍ଷ ଟଙ୍କା ସହାୟତା ପ୍ରଦାନ କରାଯିବ । ଏହାବ୍ୟତୀତ ଉଚ୍ଚଶିକ୍ଷା ପାଇଁ ସେମାନଙ୍କୁ ଶିକ୍ଷାଋଣ ମଧ୍ୟ ଯୋଗାଇ ଦିଆଯିବ । ଯାହାର ସୁଧ ପିଏମ୍ କେୟାର୍ସରୁ ପରିଶୋଧ କରାଯିବ । ସେହିପରି ଆୟୁଷ୍ମାନ ଭାରତ ଯୋଜନାରେ ୫ଲକ୍ଷ ଟଙ୍କାର ମାଗଣା ମାଗଣା ସ୍ୱାସ୍ଥ୍ୟବୀମା ୧୮ବର୍ଷ ପର୍ଯ୍ୟନ୍ତ ଯୋଗାଇ ଦିଆଯିବ । ଆଉ ଏଥିପାଇଁ ପିଏମ୍ କେୟାର ପ୍ରିମିୟମ ରାଶି ଭରିବ । ମୋଦୀ ସରକାରଙ୍କ ଦ୍ୱିତୀୟପାଳି ସରକାରର ଦୁଇ ବର୍ଷ ପୂର୍ତ୍ତି ଅବସରରେ ଏହି ଘୋଷଣା କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ତେବେ ପିଲାଙ୍କ ପାଇଁ ଏହି ସହାୟତା ପିଏମ୍ କେୟାର୍ସ ଯୋଜନା ଅଧୀନରେ ଯୋଗାଇ ଦିଆଯିବ ।