ସୁବର୍ଣ୍ଣପୁର, (ବଡ଼ ଖବରର ବ୍ୟୁରୋ): ଯୋଜନା ଅସୁମାରୀ । ସଫଳତା ବଖାଣିବାରେ ବି ସୀମା ନାହିଁ । କରୋନା କାଳରେ ପକ୍କା ଘର ତିଆରି କରି ଜାତିସଂଘରୁ ସାର୍ଟିଫିକେଟ ଆସିଛି । ହେଲେ ସୁବର୍ଣ୍ଣପୁର ଜିଲ୍ଲା ବୀରମହାରାଜପୁର ବ୍ଲକ କମିରା ଗ୍ରାମପଞ୍ଚାୟତର ଆମ୍ବସରଭଟା କୁଲସାହିର ଘସାନ ମୁଣ୍ଡାଙ୍କ ଦୁଃଖ ଦେଖିଲେ ସବୁ ଯେମିତି ମୂଲ୍ୟହୀନ ଲାଗୁଛି । ଯୋଜନା ଯେ ବାସ୍ତବତାଠାରୁ ଯୋଜନ ଯୋଜନ ଦୂରରେ ତାହା ଜଳଜଳ ଦିଶୁଛି । ଘସାନ ମୁଣ୍ଡାଙ୍କ ବୟସ ପ୍ରାୟ ୫୨ ହେବ । ଜଣେ ଜନଜାତି ସମ୍ପ୍ରଦାୟର ବିଧବା ମହିଳା । ମୁଣ୍ଡ ଗୁଞ୍ଜିବାକୁ ଘର ନାହିଁ । ପଲିଥିନ୍ ଭରସା । ଦିନ ବେଳା ଗଛ ତଳେ ଆଶ୍ରୟ ନେଉଥିବା ବେଳେ ବର୍ଷା ହେଲେ ବହୁ ଦୟନୀୟ ଅବସ୍ଥା ।
ପରିବାର କହିଲେ ପୁଅ ତୀର୍ଥ ମୁଣ୍ଡା ଓ ଝିଅ ପାନେଶ୍ୱରୀ ମୁଣ୍ଡା । ଗତ ଲଗାଣ ବର୍ଷାରେ ତାଙ୍କର ମାଟି ଘରଟି ସମ୍ପୂର୍ଣ୍ଣ ଭାବେ ଭାଙ୍ଗି ଯାଇଛି । ସ୍ଥାନୀୟ ସୁବଳୟା ରାଜସ୍ୱ ନିରୀକ୍ଷକ କାର୍ୟ୍ୟାଳୟ ପକ୍ଷରୁ ପଲିଥିନ ଖଣ୍ଡିଏ ଯୋଗାଇ ଚୁପ ହୋଇଯାଇଛନ୍ତି । ଜଙ୍ଗଲରୁ ଶାଳ ପତ୍ର ଆଣି ଖଲି , ଦନା ତିଆରି କରି ଗୁଜୁରାଣ ମେଣ୍ଟାଉ ଥିବା ସେ କହିଛନ୍ତି। ବର୍ତ୍ତମାନର କରୋନା ମାଡରେ ଖଲି, ଦନା ବିକ୍ରି ହେଉନଥିବାରୁ ଅଭାବରେ ଅନେକ ସମୟରେ ଉପାସ ରହିବାକୁ ପଡ଼ୁଛି ବୋଲି ସେ କହିଛନ୍ତି । ସ୍ଥାନୀୟ ପ୍ରଶାସନ ହେଉ ଅବା ସ୍ଥାନୀୟ ଲୋକପ୍ରତିନିଧି କାହାରି ନଜର ପଡ଼ୁନି ତାଙ୍କ ଉପରେ । ଦେଖିବାକୁ ବାକିରହିଲା ଘସାନ ମୁଣ୍ଡାଙ୍କୁ କେବେ ଆବାସ ଯୋଜନାରେ ସାମିଲ କରାଯାଉଛି ।
