ଜଙ୍ଗଲରୁ ଜିଆରଏସଙ୍କ ମୃତଦେହ ଉଦ୍ଧାର, ହତ୍ୟା ଅଭିଯୋଗ ଆଣିଲେ ପରିବାର ଲୋକେ

ନାକଟିଦେଉଳ (ବଡ଼ ଖବର ବ୍ୟୁରୋ): ଜଙ୍ଗଲରୁ ମିଳିଲା ଜିଆରଏସଙ୍କ ମୃତଦେହ । ଏଭଳି ଘଟଣା ଦେଖିବାକୁ ମିଳିଛି ସମ୍ବଲପୁର ଜିଲ୍ଲା ନାକଟିଦେଉଳ ବ୍ଲକ ଅନ୍ତର୍ଗତ ଘୋଷରାମାଳ ଗ୍ରାମରେ । ପଞ୍ଚାୟତର ଜିଆରଏସ ପ୍ରଦ୍ୟୁମ୍ନ ଦାସଙ୍କ ମୃତ ଦେହକୁ ସନ୍ଦେହ ଜନକ ଅବସ୍ଥାରେ ଉଦ୍ଧାର କରାଯାଇଛି । ମୃତ ଜିଆରଏସଙ୍କ ଘର ନାକଟିଦେଉଳ ଗ୍ରାମରେ ହୋଇଥିବା ବେଳେ ଗତ ୪ ମାସ ହେଲା ସେ ଘୋଷରାମାଳ ପଂଚାୟତରେ ଗ୍ରାମ ରୋଜଗାର ସେବକ ଭାବେ ଯୋଗଦେଇଥିଲେ । ଗତକାଲି ସେ ଡ୍ୟୁଟିକୁ ଯାଇ ଆଉ ଫେରି ନଥିଲେ । ତାଙ୍କ ମୃତ ଦେହକୁ ଝାତକିମାଲ ଠାରୁ ପ୍ୟାରା ସହି ଯିବା ରାସ୍ତାର ଏକ ନାଳ ନିକଟରୁ ଉଦ୍ଧାର କରାଯାଇଛି । ଘଟଣାସ୍ଥଳରେ ରେଢ଼ାଖୋଲ ପୋଲିସ ପହଂଚି ମୃତ ଦେହକୁ ଜବତ କରିବା ସହ ବ୍ୟବଚ୍ଛେଦ ପାଇଁ ରେଢ଼ାଖୋଲ ପଠାଇ ଏକ ମାମଲା ରୁଜୁ କରି ଘଟଣାର ତଦନ୍ତ କରୁଛି । ପରିବାର ଲୋକମାନେ କେହି ତାଙ୍କୁ ହତ୍ୟା କରି ଫିଙ୍ଗି ଦେଇଥିବା ନେଇ ଅଭିଯୋଗ କରିବା ସହ ନ୍ୟାୟ ଦାବି କରିଛନ୍ତି ।