ଗୁଣ୍ଡିଚାଙ୍କ ପାଇଁ ପକ୍କାଘର ସ୍ୱପ୍ନ
କଣିହାଁ, (ବଡ଼ ଖବର ବ୍ୟୁରୋ): ଆଉ ରହିବନି କଚ୍ଚାଘର । ଯୋଗ୍ୟ ହିତାଧିକାରୀଙ୍କୁ ମିଳିବ ପକ୍କାଘର । ଗରିବ ଅସହାୟଙ୍କ ଲାଗି ସରକାର ଘୋଷଣା କରିଛନ୍ତି ଆବାସ ଯୋଜନା । ବାସ୍ତବରେ ଏସବୁ କାର୍ଯ୍ୟକାରୀ ହେଉନାହିଁ । ଅନୁଗୁଳ ଜିଲ୍ଲା କଣିହାଁ ବ୍ଲକ ବଜ୍ରକୋଟ ପଞ୍ଚାୟତରେ ଦେଖିବାକୁ ମିଳିଛି ଏଭଳି ଛବି । ବଜ୍ରକୋଟ ଗାଁର ଗୁଣ୍ଡିଚା ଗୋଛାୟତ । ପଲିଥିନ ଟଣା ଘରେ ରହୁଥିଲେ ସୁଦ୍ଧା ଆବାସ ଯୋଜନାରୁ ବଞ୍ଚିତ ହୋଇଛନ୍ତି ।
ଗୁଣ୍ଡିଚାଙ୍କ ପରିବାର କହିଲେ ସ୍ତ୍ରୀ, ଝିଅ, ପୁଅ ଓ ବୁଢ଼ୀ ମା’ । ଗୁଣ୍ଡିଚାଙ୍କ ରୋଜଗାରରେ ୫ପ୍ରାଣୀ କୁଟୁମ୍ବ ଚଳୁଛି । ମୂଲ ମଜୁରି କରି ଯାହା ରୋଜଗାର କରନ୍ତି ସେତିକିରେ ପରିବାର ଚଳୁଛି । ଟଙ୍କା କେଉଁଠୁ ଆସିବ ଯେ ପକ୍କାଘର କରିବେ । ଭାଗ୍ୟକୁ ଆଦରି ନୁଆଣିଅାଁ ପଲିଥିନ୍ ଟଣା ଘରେ ରହୁଛନ୍ତି ଗୁଣ୍ଡିଚାଙ୍କ ପରିବାର । ସବୁବେଳେ ସାପର ଭୟ । ବର୍ଷା ହେଲେ ଘର ଭିତରେ ଭରିଯାଉଛି ପାଣି । ଅତି ଦୟନୀୟ ଅବସ୍ଥାରେ ଦିନ କାଟୁଛନ୍ତି ପରିବାର । ଅବାସ ଯୋଜନାରେ ପକ୍କାଘର ଲାଗି ରାଜନେତାଙ୍କଠାରୁ ଆରମ୍ଭ କରି ପ୍ରଶାସନିକ ଅଧିକାରୀଙ୍କୁ ନିବେଦନ କରିଥିଲେ ସୁଦ୍ଧା କିଛି ସୁଫଳ ମିଳିନାହିଁ । ଆବାସ ଯୋଜନାରେ ଅନ୍ତର୍ଭୁକ୍ତ କରିବା ଲାଗି ‘ବଡ଼ ଖବର’ ଜରିଆରେ ନିବେଦନ କରିଛନ୍ତ ଗୁଣ୍ଡିଚା ।