ପାପଡ଼ାହାଣ୍ଡି (ବଡ଼ ଖବର ବ୍ୟୁରୋ): ବ୍ୟକ୍ତି ଜୀବିତ। କିନ୍ତୁ କୃଷି ବିଭାଗ କାଗଜପତ୍ରରେ ମୃତ। ଅର୍ଥାତ ବ୍ୟକ୍ତି ଜଣକ ବଞ୍ଚି ଥାଉ ଥାଉ କୃଷି ବିଭାଗ ଅଧିକାରୀମାନେ ମାରିଦେଲେ। ଏଥିପାଇଁ କାଳିଆ ଯୋଜନାରୁ ବଞ୍ଚିତ ହୋଇଛନ୍ତି । ନବରଙ୍ଗପୁର ଜିଲ୍ଲା ପାପଡାହାଣ୍ଡି ବ୍ଲକ ମଇଦଲପୁରର ହାଟ ପଦା ସାହିରେ ରହୁଥିବା ସନ୍ତୋଷ ହରିଜନ ଏପରି ସମସ୍ୟାର ସମ୍ମୁଖୀନ ହୋଇଛନ୍ତି। ନବରଙ୍ଗପୁର ଜିଲ୍ଲା ପାପଡାହାଣ୍ଡି ବ୍ଲକ ମଇଦଲପୁରର ହାଟ ପଦା ସାହିରେ ରହନ୍ତି ସନ୍ତୋଷ ହରିଜନ । କୃଷି ବିଭାଗର ଅପରାଗତା ଯୋଗୁଁ ସେ କାଳିଆ ଯୋଜନାରେ ଟଙ୍କା ପାଇବାରେ ବଞ୍ଚିତ ହୋଇଛନ୍ତି । ସେ ବଞ୍ଚି ଥିବାବେଳେ କୃଷି ବିଭାଗ ଦସ୍ତାବିଜରେ ତାଙ୍କୁ ମୃତ ଦର୍ଶାଯାଇଛି ।
ଏ ନେଇ ସନ୍ତୋଷ ଓ ତାଙ୍କ ପରିବାର ନିରାଶ । ୨୦୧୯/୨୦ ରେ ତାଙ୍କୁ କାଳିଆ ଯୋଜନାରେ ଅନ୍ତର୍ଭୁକ୍ତ କରାଯାଇଥିଲା । ସନ୍ତୋଷ ଉକ୍ତ ଯୋଜନା ବାବଦକୁ ୫୦୦୦/- ଟଙ୍କା ପାଇଥିଲେ । କିନ୍ତୁ ଚଳିତ ବର୍ଷ ସନ୍ତୋଷଙ୍କୁ ଆଉ କାଳିଆ ଯୋଜନାରେ ଟଙ୍କା ଆସିଲା ନାହିଁ । ଟଙ୍କା ନ ଆସିବାରୁ ସେ ନିରୁପାୟ ହୋଇପଡ଼ିଥିଲେ । ଶେଷରେ ଏହାର କାରଣ ସମ୍ପର୍କରେ ଜାଣିବାକୁ ଚାହିଁଥିଲେ । ଅନଲାଇନରେ ଯାଞ୍ଚ ସମୟରେ ସେ ଜାଣିବାକୁ ପାଇଲେ ଯେ କାଳିଆ ଯୋଜନାରେ ସାମିଲ ନ କରାଯିବାର କାରଣ ସେ ମୃତ । ଏହା ଦେଖିବା ଓ ଜାଣିବା ପରେ ସନ୍ତୋଷ ବ୍ୟତିବ୍ୟସ୍ତ ହୋଇପଡ଼ିଥିଲେ । ଜୀବିତ ଲୋକଙ୍କୁ କିପରି ମୃତ କରାଗଲା ଏ ନେଇ ସେ ପାପଡାହାଣ୍ଡି କୃଷି ବିଭାଗ କାର୍ଯ୍ୟାଳୟରେ ପହଞ୍ଚି ଥିଲେ । ନିଜର ଭୁଲ ଜାଣିବା ପରେ କର୍ମଚାରୀମାନେ ସନ୍ତୋଷଙ୍କୁ ପୁନଃ ଆବେଦନ କର ତମର ଟଙ୍କା ମିଳିବ ବୋଲି ପଠାଇଦେଇଥିଲେ ।
ନିରାଶ ସନ୍ତୋଷ ଟଙ୍କା ନପାଇବାରୁ ହତାଶ ହୋଇ ପଡିଛନ୍ତି । ଯାଞ୍ଚ ସମୟର ଅଧିକାରୀ କେଉଁ ଉଦ୍ଦେଶ୍ୟରେ ତାଙ୍କୁ ମୃତ ଘୋଷଣା କଲେ ତାହାର ଯାଞ୍ଚ ଲାଗି ଦାବି କରିବା ସହ କାର୍ଯ୍ୟାନୁଷ୍ଠାନ ହେଉ ବୋଲି କହିଛନ୍ତି । ଏ ନେଇ ପାପଡାହାଣ୍ଡି ବ୍ଲକ କୃଷି ଅଧିକାରୀ ଶଶୀ ଭୂଷଣ ସେନାପତିଙ୍କୁ ପଚାରିବାରୁ ସେ ସହକାରୀ କୃଷି ଅଧିକାରୀ କହି ପାରିବେ ବୋଲି କହିଥିଲେ । ସହକାରୀ କୃଷି ଅଧିକାରୀ ଶିବାନୀ ଗୋଛାୟତଙ୍କୁ ପଚାରିବାରୁ ମୁଁ ଜାଣିନି ବୋଲି କହିଥିଲେ ବର୍ତ୍ତମାନ ମୁଁ ନୂଆରେ ଏଠାରେ ଯୋଗ ଦେଇଛି ବୋଲି କହିଥିଲେ ।
