ମୁଁ ମନ୍ତ୍ରୀ ପୁଅ, ଗୋଟିଏ ଫୋନ କଲରେ ତୁମ ବର୍ଦ୍ଦି ଓହ୍ଲାଇ ଦେବି

ଭୁବନେଶ୍ୱର(ବଡ଼ ଖବର ବ୍ୟୁରୋ): ମୁଁ ମନ୍ତ୍ରୀଙ୍କ ପୁଅ ବାଟ ଛାଡ଼ । ରବିବାର ସପ୍ତାହନ୍ତ ସଟଡାଉନ ସମୟରେ ରାଜଧାନୀ ଭୁବନେଶ୍ୱରରେ ଚାଲିଥିଲା ଜୋରଦାର ଚେକିଂ । ଅମାନିଆ ଭାବେ କଟକଣାକୁ ଖାତିର ନକରି ବୁଲୁଥିବା ଜଣେ ଯୁବକଙ୍କୁ ପୋଲିସ ଅଟକାଇଥିଲା । ଆଉ ଏହାପରେ ଯୁବକଙ୍କର ଆରମ୍ଭ ହୋଇଥିଲା ଧମକ ଚମକ । ପୋଲିସକୁ ବର୍ଦ୍ଦି ଓହ୍ଲାଇ ଦେବି ବୋଲି ମଧ୍ୟ ଧମକ ଦେବାକୁ ପଛାଇ ନଥିଲେ ଯୁବକ ଜଣକ । ତେବେ ନିଜକୁ ଜଣେ ମନ୍ତ୍ରୀଙ୍କ ପୁଅ ବୋଲି ପରିଚୟ ଦେଇ ଏପରି କହିଛନ୍ତି ଯୁବକ । କେବଳ ଏତିକି ନୁହେଁ ପୋଲିସ ସହ ଖରାପ ବ୍ୟବହାର କରିବା ପୋଲିସଙ୍କୁ ନିଜ ଚାକିରୀ ପିତା ଲାଗୁଛି କି ବୋଲି ମଧ୍ୟ ପ୍ରଶ୍ନ କରିଥିଲେ ଯୁବକ ଜଣକ ।

ଭୁବନେଶ୍ୱର ଫାୟାର ଷ୍ଟେସନ ଛକରେ ଘଟିଛି ଏପରି କାଣ୍ଡ । ଖଣ୍ଡଗିରି ଥାନା ପୋଲିସ ତରଫରୁ ସେଠାରେ ଚେକିଂ ଚାଲୁଥିବା ସମୟରେ ଜ୍ୟୋତି ନାମକ ଜଣେ ଯୁବକ ନିଜକୁ ମନ୍ତ୍ରୀଙ୍କ ପୁଅ ପରିଚୟ ଦେଇ ଖସିଯିବାକୁ ଉଦ୍ୟମ କରୁଥିଲେ । ପରିଚୟପତ୍ର ଦେଖାଇବାକୁ ପୋଲିସ କହିବା ପରେ ଯୁବକ ଜଣକ ଆରମ୍ଭ କରିଥିଲେ ଗାଳିଗୁଲଜ । ତେବେ ଯୁବକଙ୍କ ହାବଭାବରୁ ସେ ଜଣେ ମଦ୍ୟପ ଲାଗିବାରୁ ପୋଲିସ ତାଙ୍କୁ ଥାନାକୁ ଆଣିଥିଲା । ପଚରା ଉଚରା କରିବା ପରେ ଜଣା ପଡ଼ିଥିଲା ଯେ ସେ ଜଣେ ପ୍ରଭାବଶାଳୀ ମନ୍ତ୍ରୀଙ୍କ ବନ୍ଧୁଙ୍କ ପୁଅ ।