ପୁଣି ଅଡୁଆରେ ଇମ୍ରାନ ଖାନ

ନୂଆଦିଲ୍ଲୀ (ବଡ଼ ଖବର ବ୍ୟୁରୋ): ପୁଣିଥରେ ଅଡ଼ୁଆରେ ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନ। ଆଜି ତାଙ୍କ ନାଁରେ ଜାରି ହୋଇଛି ଜାମିନ ବିହୀନ ଗିରଫ ପରୱାନା। ଖାତୁନ ଜଜ ଜେବା ଚୌଧୁରୀଙ୍କୁ ଧମକ ଦେବା ଘଟଣାରେ ସିଭିଲ ଜଜ ଡିଷ୍ଟ୍ରିକ୍ଟ ସେସନ୍ସ କୋର୍ଟ ଇମ୍ରାନ ଖାନଙ୍କ ନାଁରେ ଏପରି ୱାରେଣ୍ଟ ଜାରି କରିଛନ୍ତି। ଇମ୍ରାନ୍ ଖାନଙ୍କୁ ଗିରଫ କରିବା ପାଇଁ ଆଜି ଜମନ ପାର୍କ ସ୍ଥିତ ତାଙ୍କ ବାସଭବନରେ ପହଞ୍ଚିବ ଇସ୍ଲାମାବାଦ୍ ପୁଲିସ। ଜଣେ ମହିଳା ବିଚାରପତିଙ୍କୁ ଧମକ ଦେବା ଅଭିଯୋଗରେ ଇସଲାମାବାଦର ଏକ ଅଦାଲତ ତାଙ୍କ ବିରୋଧରେ ଜାମିନ ବିହୀନ ଗିରଫ ପରୱାନା ଜାରି କରିଛନ୍ତି। ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ୍ ଖାନ୍ ଙ୍କୁ ଜେଲ୍ ପଠାଇବା ପାଇଁ ଇସଲାମାବାଦରୁ ଏକ ପୁଲିସ ଟିମ୍ ହେଲିକପ୍ଟର ଯୋଗେ ଲାହୋରରେ ପହଞ୍ଚିଛି।

ଗଣମାଧ୍ୟମରେ ପ୍ରକାଶିତ ରିପୋର୍ଟ ଅନୁଯାୟୀ, ଇସ୍ଲାମାବାଦ ଏବଂ ଲାହୋରର ପୁଲିସ ଅଧିକାରୀଙ୍କ ମଧ୍ୟରେ ହୋଇଥିବା ବୈଠକରେ ଇମ୍ରାନ ଖାନଙ୍କ ଗିରଫଦାରୀକୁ ନେଇ ଅନେକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନିଆଯାଇଛି । ଇମ୍ରାନ ଖାନଙ୍କୁ ଗିରଫ କରିବା ପାଇଁ ଇସଲାମାବାଦରୁ ପୋଲିସ ଦ୍ୱିତୀୟ ଥର ଲାହୋରରେ ପହଞ୍ଚିଛି । ସେପଟେ ଆଜି ନିମ୍ନ ଅଦାଲତରେ ଇମ୍ରାନ ଖାନ ହାଜର ହେବାର ଥିଲା। ତେବେ ସବୁ ଥର ଭଳି ଏଥର ମଧ୍ୟ ସେ ସୁରକ୍ଷା ଆଳରେ ହାଜର ହେବାରୁ ମୁକ୍ତି ପାଇଁ ଆବେଦନ କରିଥିଲେ। ତେବେ ତାଙ୍କ ଆବେଦନକୁ ଖାରଜ କରି କୋର୍ଟ ତାଙ୍କ ନାଁରେ ଗିରଫ ପରୱାନା ଜାରି କରିଥିବା ସୂଚନା ରହିଛି ।