୧୫ରେ ୧୨ ଘଣ୍ଟିଆ ମୟୂରଭଞ୍ଜ ବନ୍ଦ ଡାକରା

ବାରିପଦା(ବଡ଼ ଖବର ବ୍ୟୁରୋ): ରାଷ୍ଟ୍ରପତିଙ୍କ ଅଭିଭାଷଣ ସମୟର ବିଦ୍ୟୁତ୍ ବିଭ୍ରାଟ ପ୍ରସଙ୍ଗ । ଆସନ୍ତା ୧୫ରେ ୧୨ଘଣ୍ଟିଆ ମୟୂରଭଞ୍ଜ ବନ୍ଦ ଡାକରା ଦେଇଛି ଭଞ୍ଜସେନା। ଭାରତର ପ୍ରଥମ ନାଗରିକ ତଥା ମୟୂରଭଞ୍ଜର ସୁପୁତ୍ରୀ ତଥା ରାଷ୍ଟ୍ରପତି ଦ୍ରୌପଦୀ ମୁର୍ମୁ ବାରିପଦା ସ୍ଥିତ ମହାରାଜା ଶ୍ରୀରାମ ଚନ୍ଦ୍ର ବିଶ୍ଵବିଦ୍ୟାଳୟ ସମାବର୍ତନ କାର୍ଯ୍ୟକ୍ରମରେ ଅଭିଭାଷଣବେଳେ ବିଶ୍ଵବିଦ୍ୟାଳୟ କର୍ତ୍ତୃପକ୍ଷ, ଇଡ଼କୋ ବିଭାଗ, ଜିଲ୍ଲା ପ୍ରଶାସନ ହେଉ ବା ବିଦ୍ୟୁତ ବିଭାଗର ଖାମଖିଆଲି କାର୍ୟ୍ୟ ଯୋଗୁଁ ନଅ ମିନିଟ ଲାଇନ କଟି ଅନ୍ଧାର ହୋଇଥିଲା । ଯୋଉଁଥିପାଇଁ ମୟୂରଭଞ୍ଜବାସୀ ଅପମାନିତ ହୋଇଛନ୍ତି।

ଯାହାର ପ୍ରତିବାଦରେ ଭଞ୍ଜସେନା ପକ୍ଷରୁ ଦୋଷୀଙ୍କ ବିରୁଦ୍ଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ ପାଇଁ ଦାବି ହୋଇଥିଲା । ମାତ୍ର କୌଣସି କାର୍ଯ୍ୟାନୁଷ୍ଠାନ ନହେବା ଯୋଗୁଁ ଭଞ୍ଜସେନା ପକ୍ଷରୁ ଦୋଷୀଙ୍କ ବିରୁଦ୍ଧରେ ତୁରନ୍ତ କାର୍ଯ୍ୟାନୁଷ୍ଠାନ ପାଇଁ ୧୫ ତାରିଖ ଦିନ ୧୨ ଘଣ୍ଟିଆ ମୟୂରଭଞ୍ଜ ବନ୍ଦ ଡାକରା ଦିଆଯାଇଛି। ଏହି ବନ୍ଦରେ ସମସ୍ତ ରାଜନୈତିକ ଦଳ, ସଂଗଠନ ଏବଂ ପ୍ରତ୍ୟେକ ମୟୂରଭଞ୍ଜିଆଙ୍କୁ ପ୍ରତ୍ୟକ୍ଷ ସାମିଲ ହେବା ପାଇଁ ମୁଖପାତ୍ର ମାନସ ବେହେରା ଜଣାଇଛନ୍ତି ।