ମଣିପୁରରେ ଆଜି ଯାଏଁ ହିଂସା କମି ନାହିଁ : ଭକ୍ତଚନ୍ଦ୍ର ଦାସ

ନୂଆଦିଲ୍ଲୀ (ବଡ଼ ଖବର ବ୍ୟୁରୋ): ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ୭୭ ତମ ସ୍ୱାଧୀନତା ଦିବସରେ ଲାଲକିଲାରୁ ସମ୍ବୋଧନ କରି ମଣିପୁରରେ ଶାନ୍ତି ଫେରିଛି ବୋଲି କହିଛନ୍ତି । ଯାହାକୁ ନେଇ କଂଗ୍ରେସ ନେତା ତଥା ଦଳର ମଣିପୁର ଦାୟିତ୍ୱରେ ଥିବା ଭକ୍ତଚନ୍ଦ୍ର ଦାସ କହିଛନ୍ତି ଯଦି ମଣିପୁରରେ ଶାନ୍ତି ସ୍ଥାପନ ହୋଇଛି ତେବେ ଲାଲକିଲାରୁ ନୁହେଁ ମଣିପୁରରୁ ପ୍ରଧାନମନ୍ତ୍ରୀ ଭାଷଣ ଦିଅନ୍ତୁ । ସେ କହିଛନ୍ତି ଯେଉଁ କାମ ଦୁଇ ଦିନରେ ମଧ୍ୟରେ ହୋଇପାରିବ ବୋଲି ରାହୁଲ ଗାନ୍ଧି କହିଥିଲେ ସେହି କାମକୁ ତିନି ମାସ ହେଲାଣି ପ୍ରଧାନମନ୍ତ୍ରୀ କରିପାରୁ ନାହାନ୍ତି ।

ସେ ଆହୁରି ମଧ୍ୟ କହିଛନ୍ତି “ଆଜି ପର୍ଯ୍ୟନ୍ତ ହିଂସା କମିନାହିଁ। ଯଦି ସେ କହୁଛନ୍ତି ଯେ ଶାନ୍ତି ଫେରି ଆସିଛି, ମୁଁ ତାଙ୍କୁ ସେଠାକୁ ଯିବାକୁ ଅନୁରୋଧ କରୁଛି। ଲାଲକିଲାରୁ ଭାଷଣ ଦେବା ପରିବର୍ତ୍ତେ ଇମ୍ଫାଲରେ ଭାଷଣ ଦିଅନ୍ତୁ । ଚୁରାଚାନ୍ଦପୁରକୁ ଯାଆନ୍ତୁ । ସେଠାରେ ଲୋକମାନଙ୍କ ମଧ୍ୟରେ ଠିଆ ହୋଇ ଭାଷଣ ଦିଅନ୍ତୁ । ତା’ପରେ ସେମାନେ ବୁଝିବେ ଯେ ଦେଶର ପ୍ରଧାନମନ୍ତ୍ରୀ ଯାଇଛନ୍ତି । ସେଠାରେ ଶାନ୍ତି ଫେରିଛି । ଏହା କିଛି ନୁହେଁ ଜନସାଧାରଣଙ୍କୁ ବିଭ୍ରାନ୍ତ କରୁଥିବା ଅଭିଯୋଗ କରିଛନ୍ତି ଭକ୍ତଚନ୍ଦ୍ର ଦାସ ।