ଏସିଆନ୍ ଗେମ୍ସ ଫାଇନାଲରେ ସ୍ୱର୍ଣ୍ଣ ପଦକ ପାଇଁ ଭାରତ-ଆଫଗାନିସ୍ତାନ ଲଢେଇ

ନୂଆଦିଲ୍ଲୀ (ବଡ଼ ଖବର ବ୍ୟୁରୋ): ବାଜି ମାରିଲା ଆଫଗାନିସ୍ତାନ । ଏସିଆନ୍ ଗେମ୍ସରେ ସେମି ଫାଇନାଲରେ ପାକିସ୍ତାନକୁ ମାତ୍ ଦେଇ ଫାଇନାଲକୁ ପ୍ରବେଶ କଲା ଆଫଗାନିସ୍ତାନ । ପାକିସ୍ତାନ ପ୍ରଥମେ ବ୍ୟାଟିଂ କରି ୧୧୫ ରନ କରିଥିଲା। ଏହାର ଜବାବରେ ଆଫଗାନିସ୍ତାନ ୧୩ ବଲ ପୂର୍ବରୁ ୬ ୱିକେଟ ହରାଇ ଧାର୍ୟ୍ୟ ଟାର୍ଗେଟ ହାସଲ କରି ନେଇଛି। ଚାଇନାରେ ଚାଲିଥିବା ଏସିଆନ ଗେମ୍ସ କ୍ରିକେଟର ଦ୍ୱିତୀୟ ସେମିରେ ଆଜି ପାକିସ୍ତାନ ଓ ଆଫଗାନିସ୍ତାନ ମୁହାଁମୁହିଁ ହୋଇଥିଲେ। ପ୍ରଥମେ ବ୍ୟାଟିଂ କରିଥିବା ପାକିସ୍ତାନ ୧୮ ଓଭରରେ ସମସ୍ତ ୱିକେଟ ହରାଇ କେବଳ ୧୧୫ ରନ କରିବାକୁ ସକ୍ଷମ ହୋଇଥିଲା।

ଦଳ ପକ୍ଷରୁ ୟୁସୁଫ ସର୍ବାଧିକ ୨୪ ରନ କରିଥିବା ବେଳେ ରୋହାଲି ନଜିର ୧୦, ଅରାଫତ ମିନହାସ ୧୩ ଓ ଆମୀର ଜମାଲ ୧୪ ରନ କରିବାକୁ ସକ୍ଷମ ହୋଇଥିଲେ । ଏମାନଙ୍କ ବ୍ୟତୀତ ଆଉ କୌଣସି ପାକ ବ୍ୟାଟର ଦୁଇ ଅଙ୍କ ଛୁଇଁବାକୁ ମଧ୍ୟ ସକ୍ଷମ ହୋଇ ନଥିଲେ। ଫଳରେ ପୂରା ଟିମ ୨୦ ଓଭର ମଧ୍ୟ ଖେଳି ପାରି ନଥିଲା। ୧୮ ଓଭରରେ ପାକିସ୍ତାନ ୧୧୫ ରନ କରି ଅଲଆଉଟ ହୋଇଯାଇଥିଲା। ଏବେ ଫାଇନାଲରେ ଭାରତ-ଆଫଗାନିସ୍ତାନ ଲଢେଇ ହେବ । ସ୍ୱର୍ଣ୍ଣ ପଦକ ପାଇଁ ଲଢିବେ ଦୁଇ ଦଳ ।