ଗଣେଶ ପୂଜା ପାଇଁ ନିର୍ଦ୍ଦେଶନାମା ଜାରି

(ବଡ଼ ଖବର ବ୍ୟୁରୋ): କରୋନାର ଦ୍ୱିତୀୟ ଲହର ମଧ୍ୟରେ ମହାରାଷ୍ଟ୍ରରେ ଗଣେଶ ପୂଜା ଆରମ୍ଭ ହେବାକୁ ଯାଉଛି । ସଂକ୍ରମଣକୁ ରୋକିବା ପାଇଁ ଏଥର ମଧ୍ୟ ରାଜ୍ୟ ସରକାର ନୂତନ ନିର୍ଦ୍ଦେଶନାମା ଜାରି କରିଛନ୍ତି । ଏହି ଗାଇଡଲାଇନ ଅନୁଯାୟୀ ପାଣ୍ଡେଲରେ ଅର୍ଥାତ ସର୍ବସାଧାରଣ ମଣ୍ଡପରେ ୪ ଫୁଟ ଆକାର ମୂର୍ତ୍ତି ଏବଂ ଘରେ ୨ଫୁଟ ଆକାର ମୂର୍ତ୍ତି ଆଣି ପୂଜା କରିବାକୁ କୁହାଯାଇଛି । ପୂଜାର ପ୍ରଥମ ଦିନରେ ଏବଂ ଶେଷ ଦିନରେ କୌଣସି ଶୋଭାଯାତ୍ରାକୁ ଅନୁମତି ଦିଆଯାଇ ନାହିଁ ।

ଆୟୋଜକମାନେ ପୂଜାର ଆୟୋଜନ କରିବା ପୂର୍ବରୁ ସ୍ଥାନୀୟ କର୍ତ୍ତୃପକ୍ଷଙ୍କ ଅନୁମତି ନେବେ । ଏହି ପୂଜାକୁ ସରଳ ଓ ନିରାଡମ୍ବର ଭାବେ ପାଳନ କରିବାକୁ ନିର୍ଦ୍ଦେଶ ରହିଛି । ସାଂସ୍କୃତିକ କାର୍ଯ୍ୟକ୍ରମ କରିବାକୁ ମନା କରାଯାଇଛି । ଗାଇଡଲାଇନରେ ଆହୁରି ମଧ୍ୟ କୁହାଯାଇଛି ଯେ, ଆୟୋଜକମାନେ ମଣ୍ଡପରେ ଭିଡ଼ ନହେବା ପ୍ରତି ଧ୍ୟାନ ରଖିବେ । ବଡ଼ ମଣ୍ଡପଗୁଡିକ ସୋସିଆଲମିଡିଆ କିମ୍ବା ଲାଇଭଷ୍ଟ୍ରିମିଂ ମାଧ୍ୟମରେ ଅନଲାଇନ ଦର୍ଶନର ସୁବିଧା ଯୋଗାଇ ପାରିବେ ।