ଭୁବନେଶ୍ୱର(ବଡ଼ ଖବର ବ୍ୟୁରୋ): ସାରା ଦେଶରେ ୧୮ରୁ ଅଧିକ ବୟସ ବର୍ଗଙ୍କ ଟିକାକରଣ ଚାଲିଛି । ଟିକାକରଣ ପାଇଁ ସର୍ତ୍ତ ରଖାଯାଇଛି ଯେ କୋୱିନ ବା ଆରୋଗ୍ୟ ସେତୁ ଆପ ମାଧ୍ୟମରେ ପଞ୍ଜିକରଣ କରାଯିବ । ଅର୍ଥାତ ଅନଲାଇନରେ ପଞ୍ଜିକରଣ କରି ଟିକା ନିଆଯାଇପାରିବ । ଏଥିରେ ଅଫଲାଇନ ପଞ୍ଜିକରଣର କୌଣସି ବ୍ୟବସ୍ଥା ନାହିଁ । ତେବେ ଯଦି ଓଡ଼ିଶା କଥା ଦେଖିବା ବିଧାନସଭାରେ ଗ୍ରାମ୍ୟ ଉନ୍ନୟନ ମନ୍ତ୍ରୀ ସୁଶାନ୍ତ ସିଂ ଏକ ତଥ୍ୟ ରଖିଥିଲେ ଯାହାକୁ ନେଇ କିଛି ପ୍ରଶ୍ନ ଉଠୁଛି । ସେ କହିଥିଲେ ଓଡ଼ିଶାରେ ୬ହଜାରରୁ ଅଧିକ ଏପରି ଗ୍ରାମ ରହିଛି ଯେଉଁଠାରେ ମୋବାଇଲ ନେଟୱର୍କ ସେବା ଏପର୍ଯ୍ୟନ୍ତ ପହଞ୍ଚିପାରିନି । ଅର୍ଥାତ ସେଠାରେ ଇଣ୍ଟରନେଟ ସେବା ମଧ୍ୟ ପହଞ୍ଚିନି ।
ସେପଟେ କେବଳ ସହରାଞ୍ଚଳରେ ନୁହେଁ ଗ୍ରାମାଞ୍ଚଳ ମାନଙ୍କରେ ବି ବୃଦ୍ଧି ପାଇବାରେ ଲାଗିଛି ସଂକ୍ରମଣ । ଆଦିବାସୀ ଅଧ୍ୟୁଷିତ ଅଞ୍ଚଳରେ ମଧ୍ୟ ପ୍ରବେଶ କରି ସାରିଛି ମହାମାରୀ । ଏପରି କ୍ଷେତ୍ରରେ ସେଠାକାର ଟିକାକରଣକୁ ନେଇ ଉଠିଛି ବଡ଼ ପ୍ରଶ୍ନ । ଯେଉଁ ସ୍ଥାନକୁ ମୋବାଇଲ ନେଟୱାର୍କ ହିଁ ଯାଇନି ସେଠାରେ ଲୋକମାନେ କିପରି ଅନଲାଇନ ପଞ୍ଜିକରଣ କରିବେ? ସେହିପରି ଅନେକ ଗ୍ରାମାଞ୍ଚଳ ରହିଛି ଯେଉଁଠାରେ କିଛି ଲୋକ ଅନଲାଇନ ପଞ୍ଜିକରଣ କରିବା ଜାଣିନାହାନ୍ତି । ସେମାନଙ୍କ ଟିକାକରଣର ବ୍ୟବସ୍ଥା କିପରି କରାଯିବ? ତେବେ ଏହି ଅଞ୍ଚଳରେ ଅଫଲାଇନ ପଞ୍ଜିକରଣର ସୁବିଧା କେବେ ଯୋଗାଇବେ ସରକାର? ଟିକାକରଣରେ ଉପୁଜିଥିବା ଏହି ବଡ଼ ସମସ୍ୟାର ସମାଧାନ ପାଇଁ କି ବ୍ୟବସ୍ଥା କରିଛନ୍ତି ସରକାର?
