ଭୂସ୍ୱର୍ଗରେ ବରଫ ବର୍ଷା

ଜାମ୍ମୁ କାଶ୍ମୀର(ବଡ଼ ଖବର ବ୍ୟୁରୋ): ଧଳା ଚାଦରରେ ଘୋଡେଇ ହୋଇଛି ଧରା । ଯେଉଁଆଡେ ଦେଖିବେ ସବୁଠି ବରଫର ଆସ୍ତରଣ । ସ୍ନୋ ଫଲ୍ ଯୋଗୁଁ ଭୂସ୍ୱର୍ଗ କାଶ୍ମୀରରେ ଦେଖିବାକୁ ମିଳିଛି ଏହି ମନୋରମ ଦୃଶ୍ୟ । ଜାମ୍ମୁ ଓ କାଶ୍ମୀରର ଶ୍ରୀନଗର ଅଞ୍ଚଳରେ ଜାରି ରହିଛି ବରଫପାତ । ଗଛ ଓ ପାହାଡ ସବୁ ବରଫ ଆସ୍ତରଣରେ ଢାଙ୍କି ହୋଇଛି । ସ୍ଥାନୀୟ ବାସିନ୍ଦା ଓ ପର୍ଯ୍ୟଟକମାନେ ଏଭଳି ପରିବେଶର ବେଶ୍ ମଜା ନେଉଛନ୍ତି । ବରଫରେ ଖେଳକୁଦ ସାଙ୍ଗକୁ ମସ୍ତି କରୁଛନ୍ତି ପର୍ଯ୍ୟଟକ ।

ତେବେ ବରଫ ଯୋଗୁଁ ଟ୍ରାଫିକ୍ ସମସ୍ୟା ଉପୁଜୁଥିବା ମଧ୍ୟ ଦେଖିବାକୁ ମିଳିଛି । ଜାମ୍ମୁ ଓ ଶ୍ରୀନଗର ଜାତୀୟ ରାଜପଥରେ ତୁଷାରପାତ ଯୋଗୁଁ ବାଧାପ୍ରାପ୍ତ ହୋଇଛି ଗାଡି ଚଳାଚଳ । ସ୍ଥିତି ସ୍ୱାଭାବିକ କରିବା ପାଇଁ ସ୍ଥାନୀୟ ପ୍ରଶାସନ ପକ୍ଷରୁ ରାସ୍ତାରୁ ବରଫ ହଟାଇବା କାମ ମଧ୍ୟ ଜାରି ରହିଛି ।