ଆଜି ଘୋଷଣା ହୋଇପାରେ ନୂଆ ଏନ୍ଏସି
ଭୁବନେଶ୍ୱର (ବଡ଼ ଖବର ବ୍ୟୁରୋ): ଆଜି ସ୍ୱାୟତ୍ତ ଶାସନ ଦିବସରେ ସହରବାସୀଙ୍କୁ ୧୨ରୁ ଅଧିକ ପ୍ରକଳ୍ପ ଭେଟି ଦେବେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ରାଜ୍ୟସ୍ତରୀୟ ସମାରୋହରେ ମୁଖ୍ୟମନ୍ତ୍ରୀଙ୍କ ଦ୍ୱାରା ବିଭିନ୍ନ ଉନ୍ନତିମୂଳକ କାର୍ଯ୍ୟକ୍ରମର ଭିତ୍ତିପ୍ରସ୍ତର ଓ ଶୁଭାରମ୍ଭ ହେବ । ଆମ୍ ବସ୍ ପାଇଁ ଏଣିକି ହ୍ୱାଟସ୍ଆପ୍ରେ ଟିକଟ ବୁକିଂର ଶୁଭାରମ୍ଭ ହେବ । ଏହାସହ ଡିଜିଟାଲ୍ ଟିକଟରେ ରିହାତି ମିଳିବ । ସେହିପରି ଜାତୀୟ ଏକକ ଗମନାଗମନ କାର୍ଡର ଲୋକାର୍ପଣ କରିବେ ମୁଖ୍ୟମନ୍ତ୍ରୀ ।
ଏହି କାର୍ଡ ବଳରେ ସାରା ଦେଶରେ ଲୋକେ ସୁବିଧା ପାଇପାରିବେ । ଡିଜିଟାଲ ପାସ୍ ବ୍ୟବସ୍ଥାକୁ ଅନ୍ୟ ସହରକୁ ସମ୍ପ୍ରସାରଣ କରାଯିବ । ଟାଟା ଷ୍ଟିଲ୍ ଫାଉଣ୍ଡେସନ ସହ ବୁଝାମଣା କରି ସମାବେଶୀ ସହର ଗଠନ କରିବ ନଗର ଉନ୍ନୟନ ବିଭାଗ । ଆଜି ଘୋଷଣା ହୋଇପାରେ ନୂଆ ଏନ୍ଏସି । ସ୍ବାୟତ୍ତ ଶାସନ ଦିବସ ଅବସରରେ ରାଜ୍ୟରେ ଆଉ ୯ ଟି ନୂଆ ଏନ୍ଏସି ଘୋଷଣା କରିପାରନ୍ତି ମୁଖ୍ୟମନ୍ତ୍ରୀ । ରାଜ୍ୟରେ ୨୧ଟି ନୂଆ ଏନ୍ଏସି ଗଠନ ହେବା ନେଇ ମୁଖ୍ୟମନ୍ତ୍ରୀ ସ୍ବାଧୀନତା ଦିବସ ଅଭିଭାଷଣରେ ଘୋଷଣା କରିଥିଲେ । ଏଥିରୁ ୧୨ଟି ଏନ୍ଏସି ନେଇ ଚିଠା ବିଜ୍ଞପ୍ତି ପ୍ରକାଶ ପାଇଛି ।
ତେଣୁ ବାକି ୯ଟି ନୂଆ ଏନ୍ଏସି ଆଜି ଘୋଷଣା ହୋଇପାରେ । ପୂର୍ବରୁ ନଗର ଉନ୍ନୟନ ମନ୍ତ୍ରୀ କୃଷ୍ଣଚନ୍ଦ୍ର ମହାପାତ୍ର କହିଥିଲେ ଯେ ସ୍ବାୟତ୍ତ ଶାସନ ଦିବସ ଅବସରରେ ମୁଖ୍ୟମନ୍ତ୍ରୀ ୯ଟି ନୂଆ ଏନ୍ଏସି ଘୋଷଣା କରିବେ । ଏନ୍ଏସି ଦାବିରେ ରାଜ୍ୟର ବିଭିନ୍ନ ସ୍ଥାନରେ ଆନ୍ଦୋଳନ ହେଉଥିବାରୁ ରାଜ୍ୟ ସରକାର ଏନେଇ ସତର୍କତା ଅବଲମ୍ବନ କରିଛନ୍ତି । ମୁଖ୍ୟମନ୍ତ୍ରୀ ଉତ୍ସବ ମଞ୍ଚରେ ୯ଟି ନୂଆ ଏନ୍ଏସି ଘୋଷଣା କରିବେ । ଆଗୁଆ ନୂଆ ଏନ୍ଏସି ନାମ ଜଣାପଡ଼ିଲେ ସ୍ବାୟତ୍ତ ଶାସନ ଦିବସ ଅବସରରେ ବିକ୍ଷୋଭ ପ୍ରଦର୍ଶନର ଭୟ ଥିବାରୁ ଏହାକୁ ଗୁପ୍ତ ରଖାଯାଇଛି ।