କେନାଲ ବନ୍ଧ ଭାଙ୍ଗି ଗାଁରେ ପଶିଲା ପାଣି

ନିଆଳି (ବଡ ଖବର ବ୍ୟୁରୋ): ନିଆଳି ଜଳସମ୍ପଦ ଉପଖଣ୍ଡ ଅଧୀନ କାକଟପୁର ବ୍ରାଞ୍ଚ କେନାଲ ବନ୍ଧ ଭାଙ୍ଗିଯାଇଛି । କେନାଲର ଉତ୍ତର ପାର୍ଶ୍ଵ ବନ୍ଧ ବରିମୁଣ୍ଡଠାରେ ଭାଙ୍ଗିଛି। ଫଳରେ ବରିମୁଣ୍ଡ ଗାଁରେ ପାଣି ପଶି କୃତ୍ରିମ ବନ୍ୟା ସୃଷ୍ଟି ହୋଇଛି। ଗାଁରେ ଥିବା ପୋଖରୀଗୁଡ଼ିକ ବୁଡ଼ିଯିବା ଫଳରେ ମାଛ ଚାଷୀମାନେ କ୍ଷତିଗ୍ରସ୍ତ ହୋଇଛନ୍ତି। ବେଳକୁ ବେଳ ଗାଁରେ ପାଣି ବଢୁଥିବାରୁ ଗ୍ରାମବାସୀ ଆତଙ୍କିତ ହୋଇପଡ଼ିଛନ୍ତି। ଗ୍ରାମବାସୀ ଏବେ ଜଳବନ୍ଦୀ ଅବସ୍ଥାରେ ରହିଛନ୍ତି। ଜଳସମ୍ପଦ ବିଭାଗ ପକ୍ଷରୁ ଜେସିବି ଲଗାଇ ବନ୍ଧ ମରାମତି କରିବାକୁ ଉଦ୍ୟମ କରୁଥିଲେ ସୁଦ୍ଧା ତାହା ସମ୍ଭବ ହୋଇପାରି ନାହିଁ। ଘାଇ ର ଆକାର ଧୀରେ ଧୀରେ ବଢ଼ିବାରେ ଲାଗିଛି। ବିଭାଗୀୟ କର୍ତ୍ତୃପକ୍ଷ ତୁରନ୍ତ ଏଥିପ୍ରତି ଦୃଷ୍ଟି ଦେବାକୁ ବରିମୁଣ୍ଡ ଗ୍ରାମବାସୀ ଦାବି କରିଛନ୍ତି।