ମୁମ୍ବାଇ (ବଡ଼ ଖବର ବ୍ୟୁରୋ): ଏନସିପି ନେତା ଅଜିତ ପାୱାରଙ୍କ ମନ୍ତବ୍ୟ ନେଇ ଉତ୍ତର ରଖିଛନ୍ତି ବିଜେପି ନେତା ତଥା ମହାରାଷ୍ଟ୍ର ଉପମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସ । ଅଜିତ କହିଥିଲେ ସେ ରାଜ୍ୟର ମୁଖ୍ୟମନ୍ତ୍ରୀ ଭାବରେ ଦାୟିତ୍ୱ ଗ୍ରହଣ କରିବାକୁ ପ୍ରସ୍ତୁତ ଅଛନ୍ତି। ଏହାର ଉତ୍ତରରେ ଫଡନାଭିସ କହିଛନ୍ତି କାହାକୁ ମଧ୍ୟ ମୁଖ୍ୟମନ୍ତ୍ରୀ କରିବାରେ କିଛି ଭୁଲ ନାହିଁ। କିନ୍ତୁ ଯେ କେହି ମୁଖ୍ୟମନ୍ତ୍ରୀ ହୋଇପାରିବେ ନାହିଁ । ଅଜିତ ପାୱାରଙ୍କ ଉପରେ କଡ଼ା ମନ୍ତବ୍ୟ ଦେଇଥିବା ଶିବସେନା (ୟୁବିଟି) ସାଂସଦ ସଞ୍ଜୟ ରାଉତ ତାଙ୍କୁ ସମର୍ଥନ କରି କହିଛନ୍ତି ଏନସିପି ନେତାଙ୍କ ମୁଖ୍ୟମନ୍ତ୍ରୀ ହେବାର କ୍ଷମତା ରହିଛି।
ତେବେ ଅଜିତ ପାୱାରଙ୍କ ବକ୍ତବ୍ୟରେ କଂଗ୍ରେସ ଦଳ କହିଛି, ଉଦ୍ଧବ ଠାକରେଙ୍କ ସହ କାମ କରିବା ଅଧିକ ସୁବିଧାଜନକ ଥିବାବେଳେ ପୃଥ୍ବୀରାଜ ଚୌହାନଙ୍କ ସହ କାମ କରିବାର କୌଣସି ବିକଳ୍ପ ନ ଥିଲା। ଦେବେନ୍ଦ୍ର କହିଛନ୍ତି , ସେ ଅଜିତଙ୍କ ବିବୃତ୍ତି ଦେଖି ନାହାଁନ୍ତି। ଜଣେ ନେତାଙ୍କ ମୁଖ୍ୟମନ୍ତ୍ରୀ ହେବାକୁ ଇଚ୍ଛାରେ କିଛି ଭୁଲ ନାହିଁ । ଅନେକ ଲୋକ ମୁଖ୍ୟମନ୍ତ୍ରୀ ହେବାକୁ ଇଚ୍ଛା କରନ୍ତି। କିନ୍ତୁ ସମସ୍ତେ ମୁଖ୍ୟମନ୍ତ୍ରୀ ହୋଇପାରିବେ ନାହିଁ। ଆମେ କେବଳ ଏନେଇ ଅଜିତଙ୍କୁ ଶୁଭେଚ୍ଛା ଜଣାଇ ପାରିବା।
