ବୈତରଣୀ ପାୱାର ପ୍ରୋଜେକ୍ଟକୁ ନୋଟିସ୍
ଭୁବନେଶ୍ୱର (ବଡ଼ ଖବର ବ୍ୟୁରୋ): ବୈତରଣୀ ପାୱାର ପ୍ରୋଜେକ୍ଟ ଲିମିଟେଡ୍ (BPPL)କୁ ନୋଟିସ୍ ପ୍ରସଙ୍ଗରେ କଡ଼ା ଆଭିମୁଖ୍ୟ ଦେଖାଇଛନ୍ତି ଏସ୍ଆରସି। ବନ୍ୟା ସମୟରେ ବେନିୟମ ଭାବେ ଗେଟ୍ ଖୋଲିବାରୁ ନୋଟିସ୍ ଜାରି ହୋଇଛି । ଆବଶ୍ୟକ ପଡ଼ିଲେ BPPL ବିରୋଧରେ କାର୍ୟ୍ୟାନୁଷ୍ଠାନ ନିଆଯିବ ବୋଲି ଏସ୍ଆରସି ସ୍ପଷ୍ଟ କରିଛନ୍ତି। SRC ପ୍ରଭାକର ପାଟିଲ କହିଛନ୍ତି ଯେ, BPPL ସହମତିରେ ପାଣି ଛାଡିବା ଯୋଗୁଁ ବୈତରଣୀରେ ବନ୍ୟା ଗମ୍ଭୀର ରୂପ ଧାରଣ କଲା । ନିଜ ପାୱାର ଜେନେରେସନ କରିବା ପାଇଁ ମନ ଇଚ୍ଛା ଗେଟ୍ ଖୋଲିଥିଲା । ସେଥିପାଇଁ ସରକାରଙ୍କ ପକ୍ଷରୁ କଠୋର କାର୍ୟ୍ୟାନୁଷ୍ଠାନ ନିଆଯିବ । ତାପୂର୍ବରୁ କାରଣ ଦର୍ଶାଅ ନୋଟିସ ଜାରି କରାଯାଇଛି ।
ଏସଆରସି ଆହୁରି କହିଛନ୍ତି ଯେ, ସୂଚନା ନଦେଇ ପାଣି ଛଡ଼ାଯାଇଥିବାରୁ ବିପଦ ସୃଷ୍ଟି ହୋଇଥିଲା, ଫଳରେ ବୈତରଣୀରେ ଜଳସ୍ତର ବୃଦ୍ଧି ପାଇଥିଲା । ବନ୍ୟାରେ ୬ ଜିଲ୍ଲାର ୩୪ ବ୍ଳକର ୨୨୬ ପଞ୍ଚାୟତର ୭୪୩ ଗାଁ ପ୍ରଭାବିତ ହୋଇଛନ୍ତି । ୧୨ ଲକ୍ଷ ୮୭ ହଜାର ଲୋକ କ୍ଷତି ସହିଛନ୍ତି । ୮୪ ହଜାର ୬୬୭ ଲୋକ ସ୍ଥାନାନ୍ତର ହୋଇଛନ୍ତି । ବାଲେଶ୍ୱର ସବୁଠାରୁ ଅଧିକ ପ୍ରଭାବିତ ହୋଇଛି ।
ତେବେ କାର୍ୟ୍ୟାନୁଷ୍ଠାନ ନେବା ପୂର୍ବରୁ BPPLକୁ ନିଜ ପକ୍ଷ ରଖିବାର ସୁଯୋଗ ଦିଆଯାଇଛି। କେଉଁ ପରିସ୍ଥିତିରେ ଏବଂ କାହିଁକି ପାଣି ଛଡ଼ାଯାଇଥିଲା । ଏହାର ଜବାବ ଯାଞ୍ଚ ପରେ ସରକାର ଆବଶ୍ୟକ ପଦକ୍ଷେପ ଗ୍ରହଣ କରିବେ ବୋଲି ଏସ୍ଆରସି କହିଛନ୍ତି।