ଭୁବନେଶ୍ୱର, (ବଡ଼ ଖବର ବ୍ୟୁରୋ): ପ୍ରାୟ ବର୍ଷକ ପରେ ସତ୍ୟବାଦୀରେ ପ୍ରସ୍ତାବିତ ଓଡ଼ିଆ ବିଶ୍ୱବିଦ୍ୟାଳୟ ଆଶା ପୁଣି ଉଜ୍ଜୀବିତ ହୋଇଛି। ଏହି ବର୍ଷକ ମଧ୍ୟରେ ବିଶ୍ୱବିଦ୍ୟାଳୟ ସ୍ଥାପନ ନେଇ କୌଣସି ସ୍ୱରଶବ୍ଦ ଶୁଣିବାକୁ ମିଳୁ ନ ଥିବାବେଳେ ଆଜି ଉଚ୍ଚଶିକ୍ଷା ବିଭାଗ କମିଶନର ତଥା ସଚିବ ଶାଶ୍ୱତ ମିଶ୍ର ଏ ନେଇ ନିର୍ମାଣ ବିଭାଗ କମିଶନର ତଥା ସଚିବଙ୍କୁ ଚିଠି ଲେଖି ମନେ ପକାଇ ଦେଇଛନ୍ତି। ଚିଠିରେ ସେ ଉଲ୍ଲେଖ କରିଛନ୍ତି ଯେ ସତ୍ୟବାଦୀରେ ଓଡ଼ିଆ ବିଶ୍ୱବିଦ୍ୟାଳୟ ପାଇଁ ଏକ ଆର୍କିଟେକ୍ଚରାଲ ଡିଜାଇନ ପ୍ରସ୍ତୁତ କରିବାକୁ ୨୦୧୯ ଅକ୍ଟୋବର ୧୪ରେ ଗୃହ ନିର୍ମାଣ ବିଭାଗ ମୁଖ୍ୟଯନ୍ତ୍ରୀଙ୍କୁ ଆମେ ଅନୁରୋଧ କରିଥିଲୁ।
ତେବେ ଇତିମଧ୍ୟରେ ଗୋଟିଏ ବର୍ଷ ବିତିଯାଇଥିଲେ ମଧ୍ୟ ଆମେ ତାଙ୍କଠାରୁ କୌଣସି ଡିଜାଇନ ପାଇନାହୁଁ। ତେଣୁ ଆପଣଙ୍କୁ ଅନୁରୋଧ କରୁଛି ଯେ ଆପଣ ବ୍ୟକ୍ତିଗତ ଭାବେ ଏଥିରେ ହସ୍ତକ୍ଷେପ କରି ତୁରନ୍ତ ଆର୍କିଟେକ୍ଚରାଲ ଡିଜାଇନ ପ୍ରସ୍ତୁତ କରି ଉଚ୍ଚଶିକ୍ଷା ବିଭାଗକୁ ହସ୍ତାନ୍ତର କରନ୍ତୁ ବୋଲି ମିଶ୍ର ଲେଖିଛନ୍ତି। ଏହାର ନକଲ ଗୃହ ନିର୍ମାଣ ବିଭାଗ ମୁଖ୍ୟଯନ୍ତ୍ରୀଙ୍କ ନିକଟକୁ ସେ ପଠାଇ ଦେଇଛନ୍ତି। କମିଶନର ତଥା ସଚିବଙ୍କ ଏହି ଚିଠି ପରେ ସତ୍ୟବାଦୀରେ ଓଡ଼ିଆ ବିଶ୍ୱବିଦ୍ୟାଳୟ ପ୍ରତିଷ୍ଠା ଆଶା ପୁଣି ଉଜ୍ଜୀବିତ ହୋଇଛି। ସୂଚନାଯୋଗ୍ୟ ୨୦୧୯ ନିର୍ବାଚନର ଅବ୍ୟବହିତ ପୂର୍ବରୁ ୨୦୧୮ ଜୁଲାଇ ୨୭ରେ ସତ୍ୟବାଦୀରେ ଓଡ଼ିଆ ବିଶ୍ୱବିଦ୍ୟାଳୟ ପ୍ରତିଷ୍ଠା କରିବା ପାଇଁ ରାଜ୍ୟ ସରକାର ଘୋଷଣା କରିଥିଲେ।
ସେହିବର୍ଷ ଅକ୍ଟୋବର ୯ (ଉତ୍କଳମଣି ପଣ୍ଡିତ ଗୋପବନ୍ଧୁ ଦାସଙ୍କ ଜୟନ୍ତୀ)ରେ ମୁଖ୍ୟମନ୍ତ୍ରୀ ଏହାର ଶିଳାନ୍ୟାସ କରିଥିଲେ। ତେବେ ଇତିମଧ୍ୟରେ ୨ ବର୍ଷ ବିତିଯାଇଥିଲେ ମଧ୍ୟ ଆଜିପର୍ୟ୍ୟନ୍ତ ଏହାର ନିର୍ମାଣ କାମ ଆରମ୍ଭ ହୋଇପାରି ନାହିଁ। ମୁଖ୍ୟମନ୍ତ୍ରୀ ଶିଳାନ୍ୟାସ କରିବାର କିଛିଦିନ ପର୍ୟ୍ୟନ୍ତ ପ୍ରଶାସନିକ ତତ୍ପରତା ପ୍ରକାଶ ପାଇଥିଲେ ମଧ୍ୟ ଆଜକୁ ପ୍ରାୟ ୧ ବର୍ଷର ଊର୍ଦ୍ଧ୍ୱ ସମୟ ହେବ ଯେପରି ସବୁକିଛି ସ୍ଥାଣୁ ହୋଇଯାଇଥିଲା। ଏପରିକି ସତ୍ୟବାଦୀ ବ୍ୟତୀତ ଅନ୍ୟ କୌଣସି ସ୍ଥାନରେ ବିଶ୍ୱବିଦ୍ୟାଳୟ ପ୍ରତିଷ୍ଠା କରିବାକୁ ରାଜନୈତିକ ଚକ୍ରାନ୍ତ ଚାଲିଥିବା ସମ୍ପର୍କରେ ମଧ୍ୟ ସତ୍ୟବାଦୀରେ କିଛିଦିନ ପୂର୍ବରୁ ଚର୍ଚ୍ଚା ଜୋର ଧରିଥିଲା। ତେବେ କମିଶନର ତଥା ସଚିବଙ୍କ ଆଜିର ଚିଠି ପରେ ଏବେ ସତ୍ୟବାଦୀରେ ଓଡ଼ିଆ ବିଶ୍ୱବିଦ୍ୟାଳୟ ଆଶା ପୁଣି ଉଜ୍ଜୀବିତ ହୋଇଛି।
