ଫଟୋଗ୍ରାଫି ଦିବସରେ ଫଟୋଗ୍ରାଫର କଲେ ବୃକ୍ଷ ରୋପଣ

ପୁରୀ(ବଡ଼ ଖବର ବ୍ୟୁରୋ): ଆଜି ହେଉଛି ବିଶ୍ୱ ଫଟୋଗ୍ରାଫି ଦିବସ । ବିଭିନ୍ନ ପ୍ରାନ୍ତରେ ଫଟୋଗ୍ରାଫର ମାନେ ଏହାକୁ ପାଳନ କରୁଛନ୍ତି। ଅନୁରୂପ ଭାବେ ପୁରୀ ଜିଲ୍ଲା ଫଟୋଗ୍ରାଫର ଆସୋସିଏସନ ତରଫରୁ ମଧ୍ୟ ଏହି ଦିବସକୁ ସ୍ମରଣୀୟ କରିବା ପାଇଁ ନିଆଯାଇଛି ଏକ ଅଭିନବ ପଦକ୍ଷେପ । ଗତ ଫନି ବାତ୍ୟାରେ ଉପୁଡି ଯାଇଥିଲା ବାଲୁଖଣ୍ଡ ଅଭୟାରଣ୍ୟର ସବୁଜିମା ।

ପାଖାପାଖି ୮୪ ଲକ୍ଷ ଛୋଟ ବଡ ବୃକ୍ଷ ଉପୁଡିଯାଇଥିଲା ବୋଲି ଆକଳନ କରାଯାଇଥିଲା ।  ପୁରୀର ପରିବେଶ ସନ୍ତୁଳନ ପାଇଁ ମଧ୍ୟ ପ୍ରଶ୍ନ ସୃଷ୍ଟି ହୋଇଥିଲା । ଆଜକୁ ୨ ବର୍ଷ ପୁରିଯାଇଥିଲେ ମଧ୍ୟ ପ୍ରଶାସନ ତରଫରୁ ସେମିତି କୌଣସି ଆଖିଦୃଶିଆ ପଦକ୍ଷେପ ନିଆଯାଇନାହିଁ । ଥୁଣ୍ଟ ବୃକ୍ଷରାଜି ସବୁ ସେମିତି ରହିଛି । ଏଭଳି ସମୟରେ ଆଗେଇ ଆସିଛନ୍ତି ଏହି ଫଟୋଗ୍ରାଫର କର୍ମକର୍ତ୍ତାମାନେ । ଆଜିର ଫଟୋଗ୍ରାଫି ଦିବସକୁ ସ୍ମରଣୀୟ କରିଛନ୍ତି । ଆକାଶିଆ ଓ ଆମ୍ବ ଗଛ ସହ ଅନେକ ବୃକ୍ଷ ଏହି ଅଭୟାରଣ୍ୟରେ ରୋପଣ କରି ପର ପିଢ଼ି ପାଇଁ ଏକ ସୁନ୍ଦର ବାର୍ତ୍ତା ଦେବା ସହ ଉଦାହରଣ ସୃଷ୍ଟି କରିଛନ୍ତି ।