ବିଷାକ୍ତ ମଦ ନେଲା ଜୀବନ !

ଅନୁଗୁଳ, (ବଡ଼ ଖବର ବ୍ୟୁରୋ): ଅନୁଗୁଳ ହସ୍ପିଟାଲରେ ଜଣେ ଶ୍ରମିକଙ୍କ ମୃତ୍ୟୁକୁ ନେଇ ସନ୍ଦେହ ସୃଷ୍ଟି ହୋଇଛି। ବିଷାକ୍ତ ମଦ୍ୟପାନ ଯୋଗୁ ତାଙ୍କ ମୃତ୍ୟୁ ହୋଇଥିବା ଘର ଲୋକ ଅଭିଯୋଗ ଆଣିଛନ୍ତି। ମୃତକ ହେଉଛନ୍ତି ପଥରଗଡ଼ ଗ୍ରାମର ଶଶିକାନ୍ତ ଦେହୁରୀ (୪୫)। ତାଙ୍କ ମୃତଦେହ ବ୍ୟବଚ୍ଛେଦ ପାଇଁ ଏବେ ଶବଗୃହରେ ରଖାଯାଇଛି।
ଖାଲି ଶଶିକାନ୍ତ ନୁହନ୍ତି, ତାଙ୍କ ଗ୍ରାମର ଆଉ ଦୁଇଜଣଙ୍କର ଦୁଇଦିନ ପୂର୍ବେ ମୃତ୍ୟୁ ହୋଇଥିବା କହିଛନ୍ତି ପରିବାର ଲୋକ। ଅବଶ୍ୟ ସେହି ଦୁଇଜଣଙ୍କ ମୃତଦେହକୁ ଘର ଲୋକ ଦାହ କରି ସାରିଛନ୍ତି। ତେବେ କେଉଁ କାରଣରୁ ସେ ଦୁଇଜଣଙ୍କ ମୃତ୍ୟୁ ହୋଇଛି ତାହା ତଦନ୍ତ କଲେ ଜଣା ପଡ଼ିବ।
ଖାଲି ଏମାନେ ନୁହନ୍ତି ଆଉ ଜଣେ ମଧ୍ୟ ଅନୁଗୁଳ ମେଡିକାଲରେ ଚିକିତ୍ସିତ ହେଉଛନ୍ତି। ଗ୍ରାମର ଜଣେ ବ୍ୟକ୍ତିଙ୍କର ଦୁଇଦିନ ତଳେ ଘର ସେଣ୍ଟରିଂ କାମ ହେଉଥିଲା । କାମ ସାରିବା ପରେ ସେମାନେ ସନ୍ଧ୍ୟାରେ ମଦ ପିଇଥିବା ପରିବାର ଲୋକ କହିଛନ୍ତି।
ଏହି ଘଟଣା ସମ୍ପର୍କରେ ପୁରୁଣାକୋଟ ଥାନାରେ କୌଣସି ଅଭିଯୋଗ ହୋଇନାହିଁ କି ଅବକାରୀ ବିଭାଗ ମଧ୍ୟ ତଦନ୍ତ କରିନାହିଁ। ଶଶିକାନ୍ତଙ୍କ ମୃତଦେହ ବ୍ୟବଚ୍ଛେଦ ପରେ ପ୍ରକୃତ ତଥ୍ୟ ଜଣା ପଡ଼ିବ।