ଆଇନ୍ ଭାଙ୍ଗିଲେ ଆଇନମନ୍ତ୍ରୀ
ମହାଙ୍ଗା (ବଡ଼ ଖବର ବ୍ୟୁରୋ): କରୋନା ମହାମାରୀ ପାଇଁ ଯେତେବେଳେ ସାରା ବିଶ୍ୱ ସମସ୍ୟା ଦେଇ ଗତି କରୁଛି । ସେତେବେଳେ ଓଡ଼ିଶାର ଆଇନମନ୍ତ୍ରୀ ତଥା ସ୍ଥାନୀୟ ବିଧାୟକ ପ୍ରତାପ ଜେନା ମାହାଙ୍ଗା ଅଞ୍ଚଳରେ ଜନସମାଗମ କରି ପାନୀୟ ଜଳ ପ୍ରକଳ୍ପ ଉଦଘାଟନ କରିଛନ୍ତି । ୯ ମାସ ହେଲା ମନ୍ଦିର ଖୋଲାଯାଇ ପାରୁନାହିଁ । ହେଲେ ଆଇନମନ୍ତ୍ରୀ ଏଠି କେମିତି ଶହଶହ ଲୋକଙ୍କ ଜନସମାଗମ ଭିତରେ ପ୍ରକଳ୍ପ ଉଦଘାଟନ କରିଛନ୍ତି । ସବୁଠାରୁ ବଡ଼ ପ୍ରଶ୍ନ ହେଲା ଆଇନମନ୍ତ୍ରୀ ହୋଇ କୋଭିଡ଼ ଆଇନ ଭଙ୍ଗ କରୁଛନ୍ତି । ପୂର୍ବରୁ ଦୁଇଜଣ ବିଧାୟକ କୋଭିଡ ନିୟମକୁ ଉଲଙ୍ଘନ କରି ଲୋକଲୋଚନକୁ ଆସିଥିଲେ ।
ସାଧାରଣ ଲୋକେ କୋଭିଡ କଟକଣାକୁ ଉଲଙ୍ଘନ କଲେ ଗଣିବାକୁ ପଡୁଛି ମୋଟା ଅଙ୍କର ତଣ୍ଡ । ପୂର୍ବରୁ ଅନେକ ଲୋକେ ଫାଇନ ଦେଇଥିବାର ମଧ୍ୟ ନଜିର ରହିଛି । ସେପଟେ ଦୀର୍ଘଦିନ ହେବ ଭକ୍ତ ଓ ପୂଜକମାନେ ବାରମ୍ବାର ଗୁହାରି କରି ଆସୁଛନ୍ତି କି ମନ୍ଦିର ଖୋଲାଯାଉ । ମାତ୍ର ଏଦିଗରେ କୌଣସି ନିଷ୍ପତି ଏଯାବତ ନିଆଯାଇନାହିଁ । ରଥଯାତ୍ରା, ଗଣେଷ ପୂଜା,ଦଶହରା ଓ ବାଲିଯାତ୍ରା ଭଳି ବଡ଼ ବଡ଼ ପର୍ବ ବିନା ଭକ୍ତରେ ପାଳନ କରାଯାଇଛି । ମାତ୍ର ନେତା ମନ୍ତ୍ରୀମାନେ ସଭା ସମିତି କରି ବାରମ୍ବାର କୋଭିଡ କଟକଣାକୁ ଉଲଙ୍ଘନ କରୁଥିଲେ ସୁଦ୍ଧା ଏଥିପ୍ରତି ସରାକାର କିଛି ପଦକ୍ଷେପ ନେଉନଥିବାକୁ ନେଇ ସାଧାରଣରେ ଚର୍ଚ୍ଚା ଜୋର ଧରିଛି ।