ନ୍ୟାୟ ପାଇଁ ଗାଈଗୋରୁଙ୍କ ସହ ଜିଲ୍ଲାପାଳଙ୍କ କାର୍ଯ୍ୟାଳୟରେ ଧାରଣା
ବଲାଙ୍ଗୀର (ବଡ଼ ଖବର ବ୍ୟୁରୋ): ଜମି ବିବାଦକୁ ନେଇ ପରିବାର ସଦସ୍ୟଙ୍କ ଅଭିନବ ଧାରଣା। ପାଳିତ ଗାଈଗୋରୁ ସହ ବଲାଙ୍ଗିର ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଧାରଣା ଦେଇଛନ୍ତି। ଅଭିଯୋଗ ଅନୁସାରେ, ପୁଇଁତଲା ବ୍ଲକ ରାଣୀକଟା ଗାଁର ପଞ୍ଚାନନ କବାଟଙ୍କ ପରିବାର ନିଜ ଜମିରେ ଘର ଓ ଗାଈ ଗୁହାଳ କରି ଦୀର୍ଘ ବର୍ଷ ହେବ ରହି ଆସୁଥିଲେ। ହେଲେ ତାଙ୍କ ଜମି ପାଖରେ କିଛି ସରକାରୀ ଜମି ଥିବାବେଳେ ଯିବା ଆସିବା ପାଇଁ ରାସ୍ତା ରହିଥିଲା।
ପୂର୍ବ ଶତ୍ରୁତାକୁ କେନ୍ଦ୍ର କରି ଗାଁ ଲୋକେ ତାଙ୍କ ଗାଈଗୁହାଳ କିଛି ମାସ ହେବ ଭାଙ୍ଗି ଦେଇଛନ୍ତି। ଏପରିକି ସେମାନେ ଯିବା ଆସିବା କରୁଥିବା ରାସ୍ତାକୁ ମଧ୍ୟ ତାରବାଡ ଦେଇଥିବା ଅଭିଯୋଗ କରିଛନ୍ତି। ଏନେଇ ପୋଲିସ ଓ ଜିଲ୍ଲା ପ୍ରଶାସନ ନିକଟରେ ଜଣାଇଥିଲେ ବି କିଛି ସୁଫଳ ମିଳିନାହିଁ ଓ ତେଣୁ ନ୍ୟାୟ ପାଇଁ ଆଜି ନିଜ ଗାଈ ଗୋରୁ ସହ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଧାରଣା ଦେଇଛନ୍ତି। ନ୍ୟାୟ ନମିଳିଲେ ଆତ୍ମହତ୍ୟା କରିବେ ବୋଲି ଚେତାବନୀ ଦେଇଛନ୍ତି ।