ରାଜସ୍ଥାନରେ ଭଜନ ଲାଲଙ୍କ ରାଜ
ନୂଆଦିଲ୍ଲୀ (ବଡ଼ ଖବର ବ୍ୟୁରୋ):ରାଜସ୍ଥାନରେ ବିଜେପି ଖେଳିଛି ସରପ୍ରାଇଜ କାର୍ଡ । ଯେମିତି ଛତିଶଗଡ଼ ଓ ମଧ୍ୟପ୍ରଦେଶରେ ହୋଇଥିଲା । ସବୁ ଚର୍ଚ୍ଚିତ ନାଁ କୁ ଆଡେଇ ଦେଇ ଭଜନ ଲାଲଙ୍କ ମଥାରେ ରାଜସ୍ଥାନର ରାଜତିଳକ କରିଛି ବିଜେପି । ଏହା ସହିତ ଛତିଶଗଡ଼ ଓ ମଧ୍ୟପ୍ରଦେଶର ଆଉ ଗୋଟିଏ ଦୃଶ୍ୟ ମଧ୍ୟ ପୁନଃରାବୃତ୍ତି ହୋଇଛି । ଯେଉଁମାନେ ଆଶାୟୀ ସେହିମାନେ ସାଜିଛନ୍ତି ପ୍ରସ୍ତାବକ । ଛତିଶଗଡ଼ରେ ବିଷ୍ଣୁଦେଓ ସାଏଙ୍କ ପାଇଁ ରମଣ ସିଂ ଓ ମଧ୍ୟପ୍ରଦେଶରେ ମୋହନ ଯାଦବଙ୍କ ପାଇଁ ଶିବରାଜ ସିଂ ଚୌହାନଙ୍କୁ ପ୍ରସ୍ତାବକ ଦାୟିତ୍ୱ ଦିଆଯାଇଥିଲା । ସେହିଭଳି ରାଜସ୍ଥାନରେ ତୀବ୍ର ଆଶାୟୀ ବସୁନ୍ଧରା ରାଜେ ସିିନ୍ଧିଆଙ୍କୁ ଭଜନଲାଲଙ୍କ ପାଇଁ ପ୍ରସ୍ତାବକ ହେବାକୁ ପଡିଲା ।
ଛତିଶଗଡ଼ରେ ବିଜେପି ଆଦିବାସୀ ସମ୍ପ୍ରଦାୟରୁ ମୁଖ୍ୟମନ୍ତ୍ରୀ ବାଛିଥିବା ବେଳେ ମଧ୍ୟପ୍ରଦେଶରେ ଓବିସି ସମ୍ପ୍ରଦାୟ ଓ ରାଜସ୍ଥାନରେ ବ୍ରାହ୍ମଣ ସମ୍ପ୍ରଦାୟର ଭଜନଲାଲ ଶର୍ମା ମୁଖ୍ୟମନ୍ତ୍ରୀ ହେବେ । ଅନ୍ୟ ଦୁଇ ରାଜ୍ୟ ଭଳି ଏଠି ମଧ୍ୟ ଉପମୁଖ୍ୟମନ୍ତ୍ରୀର ର୍ଫମୁଲା ରଖାଯାଇଛି । ଛତିଶଗଡ଼ରେ ମୁଖ୍ୟମନ୍ତ୍ରୀ ହେବାକୁ ଯାଉଥିବା ବିଷ୍ଣୁଦେଓ ସାଏ ସରପଂଚରୁ ସିଏମ ଯାଏଁ ପହଞ୍ଚି ପାରିଛନ୍ତି । ସେହିଭଳି ରାଜସ୍ଥାନରେ ମୁଖ୍ୟମନ୍ତ୍ରୀ ହେବାକୁ ଯାଉଥିବା ଭଜନଲାଲ ଶର୍ମା ମାତ୍ର ଥରଟିଏ ବିଧାୟକ ହୋଇଛନ୍ତି । ଏହି ତିନି ରାଜ୍ୟରେ ନୂଆ ମୁଖ୍ୟମନ୍ତ୍ରୀ ନାଁ ସହିତ ବିଜେପିରେ ନୂଆ ଯୁଗର ରାଜନୀତି ଆଉ ଟିକିଏ ଆଗକୁ ବଢିଛି । ଗୁଜୁରାଟ, ଆସାମ, ତ୍ରିପୁରା ହରିୟାଣା ଭଳି ଛତିଶଗଡ଼ , ମଧ୍ୟପ୍ରଦେଶ, ରାଜସ୍ଥାନରେ ପୁରୁଣା ନାଁ କୁ ଭରସା ନ କରି ନୂଆ ମୁହଁକୁ ନେତୃତ୍ୱ ଦେଇଛି ବିଜେପି ।