ଉତ୍ୟକ୍ତ ଗ୍ରାମବାସୀଙ୍କ ଅଭିନବ ପ୍ରତିବାଦ
ବାରିପଦା (ବଡ଼ ଖବର ବ୍ୟୁରୋ): ରାସ୍ତାରେ ଆଣ୍ଠୁଏ ଲେଖାଏଁ କାଦୁଅ । ଗ୍ରାମ ଭିତରକୁ ଯିବାକୁ ହେଲେ ଆପଣଙ୍କୁ କାଦୁଅରେ ପଶି ଯିବାକୁ ପଡିବ । ଯାହାକୁ ନେଇ ଗ୍ରାମବାସୀ ମାନେ ବାରମ୍ବାର ପ୍ରଶାସନିକ ଅଧିକାରୀଙ୍କୁ ଅବଗତ କରାଯାଇଥିଲେ ସୁଦ୍ଧା ପଦକ୍ଷେପ ନ ନେବାରୁ ଗ୍ରାମବାସୀ କଲେ ଅଭିନଵ ପ୍ରତିବାଦ । କପ୍ତିପଦା ବ୍ଲକ ଘୁଣ୍ଟିବଣି ଗ୍ରାମରେ ଦେଖିବାକୁ ମିଳିଛି ଏଭଳି ଘଟଣା । ପାଣ୍ଡୁଛକ ଠାରୁ ଘୁଣ୍ଟିବିଲ କୁ ସଂଯୋଗ କରୁଥିବା ରାସ୍ତାରେ ଏବେ ଆଣ୍ଠୁଏ ଲେଖାଏଁ କାଦୁଅ ।
ଗ୍ରାମର ଛାତ୍ରଛାତ୍ରୀମାନେ ବିଦ୍ୟାଳୟ ଯାଇ ପାରୁ ନାହାନ୍ତି କିମ୍ବା କୌଣସି ରୋଗୀଙ୍କୁ ଡାକ୍ତରଖାନା ନେବା ନିମନ୍ତେ ଆମ୍ବୁଲାନ୍ସ ଗ୍ରାମ ଭିତରୁ ଆସି ପାରୁ ନାହିଁ । ଯାହାକୁ ନେଇ ବାରମ୍ବାର ସରପଞ୍ଚ ଙ୍କ ଠାରୁ ଆରମ୍ଭ କରି ବ୍ଲକ ପ୍ରଶାସନ କୁ ଜଣାଇଥିଲେ ସୁଦ୍ଧା କେହି ନଜର ନ ଦେବାରୁ ଆଜି ଉତ୍ୟକ୍ତ ଗ୍ରାମବାସୀମାନେ କାଦୁଅ ରାସ୍ତାରେ ଧାନ ତଳି ରୋଇ କରିଛନ୍ତି ପ୍ରତିବାଦ । ଏହାଦ୍ୱାରା ପ୍ରଶାସନ ଚେତିବ ବୋଲି କହିଛନ୍ତି ଗ୍ରାମବାସୀ । ଏହି ରାସ୍ତା ଫଳରେ ସମସ୍ୟାରେ ପଡୁଛନ୍ତି ପଚାଶ ରୁ ଅଧିକ ପରିବାର ଲୋକେ ।