ଆଜି ବି ସାରା ଦେଶରେ ଜାରି ରହିବ ସଂକଳ୍ପ ସତ୍ୟାଗ୍ରହ

ନୂଆଦିଲ୍ଲୀ (ବଡ଼ ଖବର ବ୍ୟୁରୋ): ଆଜି ବି ସାରା ଦେଶରେ ପ୍ରତିବାଦ କରିବେ କଂଗ୍ରେସ । କଂଗ୍ରେସର ସଂକଳ୍ପ ସତ୍ୟାଗ୍ରହ ଜାରି ରହିବ । ମୋଦି ସରକାରଙ୍କ ବିରୋଧରେ ପ୍ରତିବାଦ କରିବେ କଂଗ୍ରେସର ବରିଷ୍ଠ ନେତା ଓ କର୍ମୀ। ଆଦାନୀ ପ୍ରସଙ୍ଗରେ ଜେପିସି ତଦନ୍ତ ଦାବି କରି ସରକାରକୁ ଘେରିବ କଂଗ୍ରେସ। ରାହୁଲ ଗାନ୍ଧୀ ସାଂସଦ ପଦ ହରାଇବା ପରେ ଏବେ କଂଗ୍ରେସ ସାରା ଦେଶରେ ପ୍ରତିବାଦ କରୁଛି । ଗତକାଲି ମଧ୍ୟ ସାରା ଦେଶରେ ସତ୍ୟାଗ୍ରହ କରାଯାଇଥିଲା । ରବିବାର ଦିନ କଂଗ୍ରେସର ସଂକଳ୍ପ ସତ୍ୟଗ୍ରାହରେ ବିଜେପି ସବୁବେଳେ ରାହୁଲ ଗାନ୍ଧୀ ଏବଂ ନେହେରୁ-ଗାନ୍ଧୀ ପରିବାରର ସଦସ୍ୟଙ୍କୁ ଅପମାନିତ କରିଥିବା ଅଭିଯୋଗ କରିଛନ୍ତି ପ୍ରିୟଙ୍କା ଗାନ୍ଧୀ ଭଦ୍ରା।

ସେ କହିଛନ୍ତି ଯେ, ଆପଣମାନେ ମୋ ଭାଇଙ୍କୁ ଦେଶଦ୍ରୋହୀ ଏବଂ ମୀର ଜାଫର ବୋଲି କହୁଛନ୍ତି। ଆପଣମାନେ ତାଙ୍କ ମା’ଙ୍କୁ ଅପମାନିତ କରୁଛନ୍ତି । ଆପଣଙ୍କ ମୁଖ୍ୟମନ୍ତ୍ରୀ କହିଛନ୍ତି ଯେ ରାହୁଲ ଗାନ୍ଧୀ ତାଙ୍କ ବାପା କିଏ ଜାଣନ୍ତି ନାହିଁ। ତୁମେ ପ୍ରତିଦିନ ମୋ ପରିବାରକୁ ଅପମାନ କରୁଛ, କିନ୍ତୁ ଏହାକୁ ନେଇ କୌଣସି ମାମଲା ରୁଜୁ ହେଉନାହିଁ। ବିରୋଧୀ କଂଗ୍ରେସ ଦାବି କରିଛି ଯେ ଆଦାନୀ ଏବଂ ପ୍ରଧାନମନ୍ତ୍ରୀଙ୍କ ମଧ୍ୟରେ କି ସଂପର୍କ ରହିଛି ବୋଲି ରାହୁଲ ଗାନ୍ଧୀ ପ୍ରଶ୍ନ କରୁଛନ୍ତି। ଏଥିରେ ମୋଦି ସରକାର ଭୟଭୀୟ ହୋଇଯାଇଛନ୍ତି। ତେଣୁ ରାହୁଲଙ୍କ ବିରୋଧରେ ଏଭଳି ପଦକ୍ଷେପ ନିଆଯାଇଛି।