ଭୁବନେଶ୍ୱର(ବଡ଼ ଖବର ବ୍ୟୁରୋ): ପଶ୍ଚିମବଙ୍ଗ ରାଜନୀତିରେ ପ୍ରତ୍ୟେକ ଦିନ କିଛି ନା କିଛି ନୂଆ ଘଟଣା ସାମ୍ନାକୁ ଆସୁଛି । ଏହା ମଧ୍ୟରେ ବିଜେପି ନେତା ଶୁଭେନ୍ଦୁ ଅଧିକାରୀଙ୍କୁ ସିଆଇଡି ସମନ ଜାରି କରିଛି । ଏହା ସହ ଆସନ୍ତା କାଲି ୧୧ଟାରେ କୋଲକାତାର ଭବାନୀ ଭବନରେ ହାଜର ହେବାକୁ ନୋଟିସରେ ଉଲ୍ଲେଖ କରାଯାଇଛି । ତେବେ ଅଙ୍ଗରକ୍ଷୀ ସୁବ୍ରତ ଚକ୍ରବର୍ତ୍ତୀଙ୍କ ଅସ୍ୱାଭାବିକ ମୃତ୍ୟୁକୁ ନେଇ ବିଜେପି ନେତା ଶୁଭେନ୍ଦୁ ଅଧିକାରୀଙ୍କୁ ସମନ ଜାରି କରିଥିବାର ସୂଚନା ମିଳିଛି ।
ସୁବ୍ରତ ପୂର୍ବ ମେଦିନୀପୁର କାନ୍ଥିରେ ବାରାକ ଭିତରେ ନିଜକୁ ନିଜେ ଗୁଳି ମାରି ଆତ୍ମହତ୍ୟା କରିଥିଲେ । ସେହି ସମୟରେ ସୁବ୍ରତ ଟିଏମସି ସାଂସଦ ଶୁଭେନ୍ଦୁ ଅଧିକାରୀଙ୍କ ସୁରକ୍ଷା ଟିମରେ ନିୟୋଜିତ ଥିଲେ । ଏହି ମାମଲା ଚକ୍ରବର୍ତ୍ତୀଙ୍କ ପତ୍ନୀ ସୁପର୍ନା କଞ୍ଜିଲାଲଙ୍କ ଦ୍ୱାରା ପଞ୍ଜୀକୃତ ହୋଇଥିଲା । ଅପରପକ୍ଷେ ସୁବ୍ରତଙ୍କ ମୃତ୍ୟୁ ମାମଲାର ତଦନ୍ତ ଦାୟିତ୍ୱ ଚଳିତ ବର୍ଷ ଜୁଲାଇରେ ସିଆଇଡିକୁ ଦିଆଯାଇଥିଲା ।
