ବିଦ୍ୟୁତ ସଙ୍କଟକୁ ନେଇ ଅମରିନ୍ଦରଙ୍କୁ ଟାର୍ଗେଟ କଲେ ସିଦ୍ଧୁ, ସେପଟେ ନିଜେ ଦେଇନାହାନ୍ତି ୯ମାସର ବିଲ
ଚଣ୍ଡିଗଡ଼(ବଡ଼ ଖବର ବ୍ୟୁରୋ):ପଞ୍ଜାବରେ ଏବେ ଉତ୍କଟ ରୁପ ନେଲାଣି ବିଜୁଳି ସମସ୍ୟା । ବିଜୁଳିର ଘୋର ଅଭାବ ଦେଖାଦେଇଛି ରାଜ୍ୟରେ । ଯେଉଁ କାରଣୁ ଏବେ ଦିକୁ ୧୪ ଘଣ୍ଟାରୁ ଅଧିକ ସମୟ ପର୍ଯ୍ୟନ୍ତ ବିଜୁଳି କାଟ ହେଉଥିବା ଦେଖିବାକୁ ମିଳିଛି । ସେହିଭଳି ଗତ ସପ୍ତାହେ ହେବ ରାଜ୍ୟର ଗ୍ରାମାଞ୍ଚଳରେ ବିଜୁଳି ପହଞ୍ଚିପାରୁନି। ରାଜ୍ୟରେ ଦେଖାଦେଇଥିବା ଏହି ବିଜୁଳି ସଙ୍କଟକୁ ନେଇ ମୁଖ୍ୟମନ୍ତ୍ରୀ ଅମରନ୍ଦର ସିଂହଙ୍କୁ ସମାଲୋଚନା କରିଛନ୍ତି ବିଦ୍ରୋହୀ ନେତା ନବଜୋତ ସିଂହ ସିଦ୍ଧୁ । କେବଳ ପଞ୍ଜାବ ମୁଖ୍ୟମନ୍ତ୍ରୀଙ୍କୁ ନୁହେଁ ଶିରୋମଣି ଅକାଳୀ ଦଳକୁ ମଧ୍ୟ ଦାୟୀ କରିଛନ୍ତି ସିଦ୍ଧୁ ।
ଏହି ପ୍ରସଙ୍ଗକୁ ନେଇ ସିଦ୍ଧୁ ସର୍ବାଧିକ ୯ଟି ଟ୍ୱିଟ କରିଛନ୍ତି । ତେବେ ଏହି ଟ୍ୱିଟ ପରେ ଅମରନ୍ଦର ସିଂହଙ୍କୁ ସିଧାସଳଖ ଟାର୍ଗେଟ କରିଛନ୍ତି ଜନସାଧାରଣ । ସେପଟେ ଅମରିନ୍ଦରଙ୍କର ସମର୍ଥକମାନେ ମଧ୍ୟ ସିଦ୍ଧୁଙ୍କୁ ଘେରିଛନ୍ତି । ଦଳ ବିରୋଧୀ କାର୍ଯ୍ୟ ପାଇଁ ସିଦ୍ଧୁଙ୍କୁ ମଧ୍ୟ ସମାଲୋଚନା କରିଛନ୍ତି । କଂଗ୍ରେସ ମଧ୍ୟରେ ବଢ଼ିଚାଲିଥିବା ଏହି କଳହକୁ ନେଇ ହାଇକମାଣ୍ଡଙ୍କ ଚିନ୍ତା ବି ବଢ଼ିଛି ।
ତେବେ ଏହା ମଧ୍ୟରେ ଅନ୍ୟ ଏକ ତଥ୍ୟ ଆସିଛି ଯାହା ଏବେ ଚର୍ଚ୍ଚାର ବିଷୟ ପାଲଟିଛି । ନବଜୋତ ସିଂହ ସିଦ୍ଧୁ ଗତ ୯ ମାସର ବିଦ୍ୟୁତ ବିଲ ପୈଠ କରିନାହାନ୍ତି । ବିଜୁଳୀ ଦର ବଢ଼ୁଥିବାରୁ ସରକାର ତଥା ପୂର୍ବ ସରକାରମାନଙ୍କୁ ସମାଲୋଚନା କରୁଥିବା ବେଳେ ନିଜେ କିପରି ବିଦ୍ୟୁତ ବିଲ ପୈଠ କରିନାହାନ୍ତି ତାହା ଏବେ ଆଲୋଚନାର ବିଷୟ ହୋଇଛି । ସିଦ୍ଧୁଙ୍କ ବକେୟା ବିଲ ପ୍ରାୟ ୮ଲକ୍ଷ ୬୭ହଜାର ୫୪୦ ଟଙ୍କା ହୋଇଥିବା ଜଣାପଡ଼ିଛି ।