ଏଣକି ଘରକୁ ଘର ଯାଇ କରାଯିବ ଟିକାକରଣ: ପ୍ରଧାନମନ୍ତ୍ରୀ

ନୂଆଦିଲ୍ଳୀ(ବଡ଼ ଖବର ବ୍ୟୁରୋ): କରୋନାକୁ ହରାଇବା ପାଇଁ ପ୍ରଧାନମନ୍ତ୍ରୀଙ୍କ ନୂଆଁ ମନ୍ତ୍ର । ଏଣିକି ଘରକୁ ଘର ଯାଇ କରାଯିବ ଟିକାକରଣ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଜି-୨୦ ସମ୍ମିଳନୀ ଏବଂ କପ୍ ୨୬ରେ ଯୋଗଦେଇ ସ୍ୱଦେଶ ଫେରିବା ପରେ ନେଇଛନ୍ତି ଏପରି ନିଷ୍ପତ୍ତି । ଟିକାକରଣ ପାଇଁ ଜିଲ୍ଲାର ସମସ୍ତ ଡିଏମମାନଙ୍କ ସହ ଭିଡଓ କନଫରେନ୍ସିଂ ମାଧ୍ୟମରେ ପ୍ରଧାନମନ୍ତ୍ରୀ ଏକ ସମୀକ୍ଷା ବୈଠକ କରିଥିଲେ । ଦେଶରେ ଟିକାକରଣକୁ ତ୍ୱରାନ୍ୱିତ କରିବା ପାଇଁ ଲୋକଙ୍କୁ ସଚେତନ କରିବା ଆବଶ୍ୟକ ବୋଲି ପ୍ରଧାନମନ୍ତ୍ରୀ ମୋଦି କହିଛନ୍ତି । ତେବେ ଏଥିପାଇଁ କରୋନା ୱାରିୟର୍ସଙ୍କୁ ପ୍ରଚାର କରିବାକୁ ପଡ଼ିବ ଏବଂ ଲୋକଙ୍କୁ ବୁଝାଇବାକୁ ପଡ଼ିବ ।

ଏପରିକି ଏଥିରେ ସ୍ଥାନୀୟ ଧାର୍ମିକ ନେତାଙ୍କ ସାହାଯ୍ୟ ମଧ୍ୟ ନେଇପାରିବେ ଏବଂ ଦୁଇ ମିନିଟର ଭିଡିଓ ପ୍ରସ୍ତୁତ କରି ଲୋକଙ୍କ ମଧ୍ୟରେ ବାର୍ତ୍ତା ଦେଇ ପାରିବେ ବୋଲି ପ୍ରଧାନମନ୍ତ୍ରୀ କହିଛନ୍ତି । ପ୍ରଧାନମନ୍ତ୍ରୀ ଅଧିକାରୀମାନଙ୍କୁ ପ୍ରତ୍ୟେକ ଗାଁ, ଜିଲ୍ଲାର ପ୍ରତ୍ୟେକ ସହର ପାଇଁ ଏକ ଭିନ୍ନ ଋଣନୀତି ପ୍ରସ୍ତୁତ କରିବା ଉପରେ ଗୁରୁତ୍ୱାରୋପ କରିଛନ୍ତି । ସେପଟେ ଅଞ୍ଚଳ ଅନୁସାରେ ଆବଶ୍ୟକତାକୁ ଦୃଷ୍ଟିରେ ରଖି ୨୦ ରୁ ୨୫ ଜଣିଆ ଦଳ ଗଠନ କରି ଟିକାଦାନ ଅଭିଯାନ କରିବାକୁ ପ୍ରଧାନମନ୍ତ୍ରୀ ପରାମର୍ଶ ଦେଇଛନ୍ତି । ଗୁଜବ ବିରୋଧରେ ଲୋକଙ୍କୁ ଅଧିକରୁ ଅଧିକ ସଚେତନ କରାଇବା ମଧ୍ୟ ବୋଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କହିଛନ୍ତି ।