ନବନିର୍ମାଣ ଛାତ୍ର ସଂଗଠନ ପକ୍ଷରୁ ଧାରଣା

ଭଦ୍ରକ, (ବଡ଼ ଖବର ବ୍ୟୁରୋ) : କରୋନା ଆଳରେ ଜିଲ୍ଲାବାସୀଙ୍କୁ ଉପଯୁକ୍ତ ସ୍ୱାସ୍ଥ୍ୟସେବା ପ୍ରଦାନ କରୁନାହିଁ ଜିଲ୍ଲା ସ୍ୱାସ୍ଥ୍ୟ ବିଭାଗ । ସମଗ୍ର ଜିଲ୍ଲାରେ ଚିକିତ୍ସା ବ୍ୟବସ୍ଥା ଏକ ପ୍ରକାର ଠପ ହୋଇଯାଇଛି । ମୁଖ୍ୟ ଚିକିତ୍ସାଳୟର ବିଭିନ୍ନ ସମସ୍ୟା ନେଇ ନବନିର୍ମାଣ ଯୁବଛାତ୍ର ସଂଗଠନ ଆନ୍ଦୋଳନକୁ ଓହ୍ଲାଇଛି । ଏ ନେଇ ମୁଖ୍ୟ ଚିକିତ୍ସାଲୟ ପରିସରରେ ଛାତ୍ର ସଂଗଠନ ପକ୍ଷରୁ ୧୦ ଦଫା ଦାବି ସହ ଧାରଣା ଦିଆଯାଇଛି । ମେଡିକାଲରେ ସ୍ୱାସ୍ଥ୍ୟସେବା ବିପର୍ୟ୍ୟସ୍ତ ହୋଇଥିବା ବେଳେ, କରୋନା ସମୟରେ ଡାକ୍ତରଙ୍କ ଅବହେଳା ଯୋଗୁଁ ସାଧାରଣ ରୋଗୀ ଚିକିତ୍ସା ନ ପାଇ ଅନେକ ଅସୁବିଧା ରେ ସମ୍ମୁଖୀନ ହେବା ସହ ମୃତ୍ୟୁ ମୁଖରେ ପଡୁଛନ୍ତି । ରାଜ୍ୟ ସରକାର କରୋନା ମହାମାରୀ ସମୟରେ ଉପଯୁକ୍ତ ଚିକିତ୍ସା ଯୋଗାଇ ଦେବା ପାଇଁ ନିର୍ଦ୍ଧେଶ ଦେଇଥିଲେ, ହେଲେ ତାହା କେବଳ କାଗଜ କଲମ ମଧ୍ୟରେ ସୀମିତ ରହିଯାଇଛି । ଭଦ୍ରକ ମୁଖ୍ୟ ଚିକିତ୍ସାଲୟ ଉପରେ ୩ଟି ପଡୋସୀ ଜିଲ୍ଲାର ୧୬ ଲକ୍ଷ ଲୋକ ନିର୍ଭର କରୁଛନ୍ତି । କିନ୍ତୁ ଚିକିତ୍ସାଳୟରେ ଅଧିକାଂଶ ଡାକ୍ତରପଦବୀ ଖାଲି ପଡିଛି, ରକ୍ତଭଣ୍ଡାରରେ ରକ୍ତର ଅଭାବ ରହିଛି, ଚିକିତ୍ସାଳୟରେ ଆଇ.ସି.ୟୁ ଓ ଭେଣ୍ଟିଲେଟର ବ୍ୟବସ୍ଥା ନାହିଁ । ସରକାରୀ ଡାକ୍ତର ଘରୋଇ ଚିକିତ୍ସାଳୟରେ ଚିକିତ୍ସା କରୁଛନ୍ତି । ଏ ସବୁ ଦିଗ ଉପରେ ସରକାର ତୁରନ୍ତ ପଦକ୍ଷେପ ଗ୍ରହଣ କରନ୍ତୁ, ନଚେତ ଆଗାମୀ ଦିନରେ ନବନିର୍ମାଣ ଛାତ୍ର ସଂଗଠନ ବିପର୍ୟ୍ୟସ୍ତ ସ୍ୱାସ୍ଥ୍ୟ ସେବାକୁ ନେଇ ରାଜ୍ୟବ୍ୟାପୀ ଆନ୍ଦୋଳନ କରିବ ବୋଲି ଚେତାବନୀ ଦେଇଛି ।