ଭଙ୍ଗା ଛାତତଳେ ପିଲା ଗଢୁଛନ୍ତି ଭବିଷ୍ୟତ

ଚାନ୍ଦବାଲି (ବଡ଼ ଖବର ବ୍ୟୁରୋ): ଶ୍ରେଣୀ ଗୃହ ଅଭାବ । ଭଙ୍ଗା ଛାତତଳେ ପିଲା ଗଢୁଛନ୍ତି ଭବିଷ୍ୟତ । ବିପଦ ସଂକୁଳ ଘରେ ପାଠ ପଢୁଛନ୍ତି ଛାତ୍ରଛାତ୍ରୀ । ରାଜ୍ୟ ସରକାର ଶିକ୍ଷା ଉପରେ ଗୁରୁତ୍ୱ ଦେଉଥିବା କହୁଥିବା ବେଳେ ବାସ୍ତବ ଚିତ୍ର କିନ୍ତୁ ପୁରା ଓଲଟା । ଏମିତି ଏକ ଘଟଣା ଦେଖିବାକୁ ମିଳିଛି ଭଦ୍ରକ ଜିଲ୍ଲା ଚାନ୍ଦବାଲି ବ୍ଲକ ତୋଟାପଡା ପଞ୍ଚାୟତ ପଞମୁଖା ସରକାରୀ ବିଦ୍ୟାଳୟରେ । ଏହି ସ୍କୁଲ ୧୯୪୪ମସିହାରେ ସ୍ଥାପନ ହୋଇଥିଲା । ପ୍ରଥମେ ଚାଳଘରେ ଶିକ୍ଷାଦାନ ଚାଲୁଥିଲା।

ଏବେ ଏହି ସ୍କୁଲର ୫ଟି କ୍ଲାସ ପାଇଁ ଅଛି ଦୁଇଟି ଶ୍ରେଣୀଗୃହ । ସେଥିରେ ୨୦୦ରୁ ଅଧିକ ଛାତ୍ରଛାତ୍ରୀ ଅଧୟନ କରୁଛନ୍ତି । ଶ୍ରେଣୀ ଗୃହ ଛାତଫାଟି ଆଁ କରିଛି । ଭୟ ଓ ଆତଙ୍କରେ ପାଠ ପଢୁଛନ୍ତି ଛାତ୍ରଛାତ୍ରୀ। ଶ୍ରେଣୀ ଗୃହ ସମସ୍ୟା ସମ୍ପର୍କରେ ରାଜ୍ୟ ସରକାରଙ୍କୁ ଲିଖିତ ଭାବେ ଜଣାଇ ଦିଆଯାଇଥିଲେ ମଧ୍ୟ ସୁଫଳ ମିଳୁନାହିଁ। ସରକାର ଯଦି ନୂତନ ଗୃହ ଯୋଗାଇ ଦିଅନ୍ତି, ଛାତ୍ରଛାତ୍ରୀମାନେ ଭଲରେ ଶିକ୍ଷା ଗ୍ରହଣ କରିପାରନ୍ତେ ।