ଜଳେଶ୍ୱର (ବଡ଼ ଖବର ବ୍ୟୁରୋ): ବଢୁଛି ସୁବର୍ଣ୍ଣରେଖା , କମୁଛି ଜଳକା । ବାରମ୍ବାର ଲଘୁଚାପ ଜନିତ ବର୍ଷା ଯୋଗୁଁ ବିଭିନ୍ନ ନଦୀର ଜଳସ୍ତର କ୍ରମଶଃ ଅଧିକ ହୋଇଛି । ପୁଣି ସୁବର୍ଣ୍ଣରେଖା ବଢୁଥିବା ବେଳେ ଜଳକା ଧୀରେ ଧୀରେ କମୁଛି । ଜଳେଶ୍ୱର ରାଜଘାଟ ଠାରେ ସୁବର୍ଣ୍ଣରେଖାର ସତର୍କ ସଂକେତ ୯.୪୫ ମିଟର ଥିବାବେଳେ ଆଜି ସକାଳ ୮ଟା ସୁଦ୍ଧା ୮.୭୫ ମିଟରକୁ ବୃଦ୍ଧି ପାଇଛି ।
ସେପଟେ ଜଳକା ବସ୍ତା ମଥାନି ଠାରେ ଏବେବି ବିପଦ ସଂକେତ ଉପରେ ପ୍ରବାହିତ ହେଉଥିଲେ ମଧ୍ୟ ପୂର୍ବ ଅପେକ୍ଷା ଆଜି ତାହା ଧୀରେ ଧୀରେ ଜଳସ୍ତର ହ୍ରାସ ପାଉଛି । ତେବେ ବାରମ୍ବାର ସୁବର୍ଣ୍ଣରେଖା ଓ ଜଳକା ନଦୀ ଫୁଲିବା ଦ୍ୱାରା ଜଳେଶ୍ୱର ,ଭୋଗରାଇ, ବାଳିଆପାଳ ଓ ବସ୍ତା ବ୍ଲକର କିଛି ତଳିଆ ଅଞ୍ଚଳରେ ବନ୍ୟା ସୃଷ୍ଟି ହେଉଛି । ଏଭଳି ସ୍ଥିତିକୁ ଆଖି ଆଗରେ ରଖି ସୁବର୍ଣ୍ଣରେଖାର ଜଳସ୍ତର କ୍ରମଶଃ ବୃଦ୍ଧି ପାଇବା ଫଳରେ ଜିଲ୍ଲା ପ୍ରଶାସନ ପକ୍ଷରୁ ଜଳେଶ୍ୱର ଏବଂ ବାଳିଆପାଳ ବ୍ଲକରେ ଦୁଇ ପ୍ଲାଟୁନ ଏନଡିଆରଏଫ ଟିମ କୁ ଆଗୁଆ ମୁତୟନ ରଖାଯାଇଛି ।
