ଟି-ଟ୍ୱେଣ୍ଟି ବିଶ୍ୱକପ: ଆଜି ସ୍କଟଲାଣ୍ଡକୁ ଭେଟିବ ଟିମ ଇଣ୍ଡିଆ
ମୁମ୍ବାଇ (ବଡ଼ ଖବର ବ୍ୟୁରୋ): ଟି-ଟ୍ୱେଣ୍ଟି ବିଶ୍ୱକପରେ ଆଜି ସ୍କଟଲାଣ୍ଡକୁ ଭେଟିବ ଟିମ୍ ଇଣ୍ଡିଆ । ସନ୍ଧ୍ୟା ୭ଟାରେ ଦୁବାଇରେ ଖେଳାଯିବ ଏହି ମ୍ୟାଚ । ଆଜିର ମ୍ୟାଚକୁ ଜିତି ସେମିଫାଇନାଲ ପ୍ରବେଶ କରିବା ଲକ୍ଷ୍ୟରେ ଟିମ ଇଣ୍ଡିଆ । ଚଳିତ ଟି-୨୦ ବିଶ୍ବକପରେ ପ୍ରଥମ ଦୁଇଟି ମ୍ୟାଚରେ ଶୋଚନୀୟ ପରାଜୟ ହୋଇଥିଲା । ତୃତୀୟ ମ୍ୟାଚରେ ଆଫଗାନିସ୍ତାନ ବିପକ୍ଷରେ ଏକ ଦମଦାର ବିଜୟ ଲାଭ କରିଥିଲା ଭାରତ। କର ବା ମର ମ୍ୟାଚରେ ଚମତ୍କାର ପ୍ରଦର୍ଶନ କରି ସେମିଫାଇନାଲ ଯିବା ଆଶା ଉଜ୍ଜିବୀତ ରଖିଛି ଟିମ୍ ଇଣ୍ଡିଆ ।
ଆଫଗାନିସ୍ତାନ ବିପକ୍ଷରେ ଉଭୟ ବ୍ୟାଟିଂ ଓ ବୋଲିଂରେ ଭଲ ପ୍ରଦର୍ଶନ କରିଥିଲା ଭାରତ । ବ୍ୟାଟିଂ କ୍ଷେତ୍ରରେ ଦୁଇ ଓପନର ରୋହିତ ଶର୍ମା ଓ କେ ଏଲ ରାହୁଲ ଶତକୀୟ ପାର୍ଟନରସିପ୍ କରିଥିଲେ । ଏହାପରେ ଋଷଭ ପନ୍ତ ଓ ହାର୍ଦ୍ଦିକ ପାଣ୍ଡ୍ୟା ମଧ୍ୟ ଧୁଆଁଧାର ଫିନିସିଂ କରିଥିଲେ । ତେବେ ଆଫଗାନିସ୍ତାନ ବିପକ୍ଷରେ ବିଜୟ ପରେ ଆଜି ସ୍କଟଲାଣ୍ଡ ବିପକ୍ଷରେ ମଧ୍ୟ ସେହି ଫର୍ମ ବଜାୟ ରଖିବାକୁ ଚେଷ୍ଟା କରିବ ବିରାଟ ବ୍ରିଗେଡ ।