ଭୟାବହ ଅଗ୍ନିକାଣ୍ଡ, ୯ ମୃତ
କୋଲକାତା(ବଡ଼ ଖବର ବ୍ୟୁରୋ): କୋଲକାତାର ଏକ ହୋଟେଲ୍ରେ ଭୟାବହ ଅଗ୍ନିକାଣ୍ଡ, ୯ ମୃତ । ମୃତକଙ୍କ ମଧ୍ୟରୁ ୨ ମହିଳା ଓ ଜଣେ ଶିଶୁ ରହିଥିବାବେଳେ ଏକାଧିକ ଆହତ ହୋଇଛନ୍ତି । ସମସ୍ତ ମୃତକ ବାଂଲାଦେଶୀ ଥିବା ସୂଚନା ମିଳିଛି । ସମସ୍ତେ ଚିକିତ୍ସା ପାଇଁ ଆସିଥିଲେ । ଶୋଇଥିବା ବେଳେ ବିଳମ୍ବିତ ରାତିରେ ଅଗ୍ନିକାଣ୍ଡ ଘଟିଥିଲା । ଅଚାନକ ହୋଟେଲରୁ ଧୂଆଁ ବାହାରିବା ଦେଖିବା ପରେ ଖବର ବ୍ୟାପିଯାଇଥିଲା। ନ୍ୟୁ ମାର୍କେଟ ଥାନା ପୁଲିସର ସୂଚନା ମୁତାବକ ନିଆଁ ଏତେ ଭୟଙ୍କର ଥିଲା ଯେ ଲୋକମାନେ ବାହାରକୁ ଆସିବା ମୁସ୍କିଲ ଥିଲା ।
ହୋଟେଲର ପ୍ରସ୍ଥାନ ରାସ୍ତାରେ ନିଆଁ ଲାଗିଥିବାରୁ ଏବଂ ମଧ୍ୟରାତ୍ରି ହୋଇଥିବାରୁ ବାହାରକୁ ଆସିବା କଷ୍ଟକର ଥିଲା। ଅଗ୍ନିଶମବାହିନୀ ସୂତ୍ରରୁ ଜଣାପଡିଛି ଯେ, ରାତି ପ୍ରାୟ ୨ଟା ୪୫ ରେ ଅଗ୍ନିକାଣ୍ଡ ଘଟିଥିଲା । ମଧ୍ୟରାତ୍ରି ହୋଇଥିବାରୁ ଲୋକମାନେ ହୋଟେଲରେ ଶୋଇଥିଲେ। ଅଗ୍ନିଶମ କର୍ମଚାରୀମାନେ ଏହା ମଧ୍ୟ କହିଛନ୍ତି ଯେ ହୋଟେଲ ଭିତରେ ପର୍ଯ୍ୟାପ୍ତ ଅଗ୍ନି ନିର୍ବାପକ ବ୍ୟବସ୍ଥା ନଥିଲା । ହୋଟେଲ ସାରା ସଂକୀର୍ଣ୍ଣ ରାସ୍ତା ଥିଲା । ଯାହାଫଳରେ ଅଗ୍ନିକାଣ୍ଡ ପରେ ତୁରନ୍ତ ବାହାରକୁ ବାହାରିବା ସମ୍ଭବ ହୋଇନଥିଲା । ୨ ଦିନ ତଳେ ବୀରଭୂମି ସ୍ଥିତ ଏକ ହୋଟେରେ ନିଆଁ ଲାଗି ୯ ଜଣଙ୍କ ମୃତ୍ୟୁ ହୋଇଥିଲା ।