ତାହାଲେ ଏହା ହେଉଛି ୱାଂସିଟନ ଠାରୁ ଭଲ ରାସ୍ତା !
ଭୁବନେଶ୍ୱର(ବଡ଼ ଖବର ବ୍ୟୁରୋ): ମଧ୍ୟପ୍ରଦେଶର ଭୋପାଳରେ ଏକ ଅଜବ ଦୃଶ୍ୟ ଦେଖିବା ପାଇଁ ମିଳିଛି । ଏଠାରେ ବହୁ ସଂଖ୍ୟକ ମହିଳା ଖାଲଢିମା ରାସ୍ତାରେ କ୍ୟାଟୱାକ ଆୟୋଜନ କରିଥିଲେ । ଏଭଳି କରି ମହିଳାମାନେ ସରକାରଙ୍କ ଦୃଷ୍ଟିକୁ ଆକର୍ଷଣ କରିବା ପାଇଁ ନୂଆ ପ୍ରୟାସ କରିଥିବାର ଦେଖିବାକୁ ମିଳିଛି । ଏହି ପୁରା ଘଟଣା ବର୍ତ୍ତମାନ ସୋସିଆଲ ମିଡିଆରେ ଖୁବ ଭାଇରାଲ ହେବାରେ ଲାଗିଛି ।
ଅପରପକ୍ଷରେ କ୍ୟାଟୱାକର ଆୟୋଜନ କରିଥିବା ଅଂଶୁ ଗୁପ୍ତା ଦାନିଶ ନଗରର ବୋଲି ସୂଚନା ମିଳିଛି । ତେବେ ତିନି ଦଶନ୍ଧି ପୂର୍ବରୁ ଏଠାରେ କିଣାଯାଇଥିବା ପ୍ଲଟଗୁଡିକର ଦାମ ବହୁ ଅଧିକା ଥିଲା । ଯାହାଫଳରେ ସମ୍ପୃକ୍ତ ଅଞ୍ଚଳରେ ଅଧିକ ଟିକସ ନିଆଯାଉଛି । ହେଲେ ସମଗ୍ର ଅଞ୍ଚଳରେ କୌଣସି ବିକାଶମୂଳକ କାର୍ଯ୍ୟ ହେଉନାହିଁ ବୋଲି ଅଂଶୁ ଗୁପ୍ତା ଅଭିଯୋଗ କରିଛନ୍ତି । ଯେହେତୁ ଅଧିକାରୀ ଏବଂ ନିର୍ବାଚିତ ପ୍ରତିନିଧୀମାନେ ମୌଳିକ ଆବଶ୍ୟକତା ମଧ୍ୟ ପୂରଣ କରିପାରୁ ନାହାଁନ୍ତି ।
ତେଣୁ ଆମେ ଅଭିନବ ପ୍ରୟାସରେ ମଧ୍ୟପ୍ରଦେଶ ସରକାରଙ୍କୁ ଏହା ଅବଗତ କରାଉଛୁ ବୋଲି ଅଭିଯୋଗକାରୀ କହିଛନ୍ତି । ଏହା ସହ ଯଦି ସମ୍ପୃକ୍ତ ଅଞ୍ଚଳର ସମାଧାନ ନହୁଏ ତାହାଲେ ସେମାନେ ଭୋଟ ଦେବେ ନାହିଁ କି ଟିକସ ଦେବେ ନାହିଁ ବୋଲି ଚେତାବନୀ ଦେଇଛନ୍ତି ।