ଜଣାପଡ଼ିଛି ଦୁର୍ଘଟଣାର କାରଣ: ଅଶ୍ୱିନୀ ବୈଷ୍ଣବ
ଭୁବନେଶ୍ୱର (ବଡ଼ ଖବର ବ୍ୟୁରୋ): ଟ୍ରେନ୍ ଟ୍ରାଜେଡିର ଉଦ୍ଧାର କାର୍ଯ୍ୟ ସରିଥିବା କହିଲେ ରେଳ ମନ୍ତ୍ରୀ ଅଶ୍ୱିନୀ ବୈଷ୍ଣବ । ରେଲ୍ ସେଫ୍ଟି କମିଶନ ଖୁବ୍ ଶୀଘ୍ର ରିପୋର୍ଟ ଦାଖଲ କରିବେ । ରିପୋର୍ଟ ଆଧାରରେ କାର୍ଯ୍ୟାନୁଷ୍ଠାନ ହେବ ବୋଲି କହିଲେ ରେଳ ମନ୍ତ୍ରୀ । ଦୁର୍ଘଟଣାର ମୂଳ କାରଣ ଜଣାପଡ଼ିଥିବା ଅଶ୍ୱିନୀ କହିଛନ୍ତି । ଇଲେକ୍ଟ୍ରୋନିକ୍ ଇଣ୍ଟରଲକିଂ ସିଷ୍ଟମ ତ୍ରୁଟି ଯୋଗୁଁ ଦୁର୍ଘଟଣା ଘଟିଛି । ଦୁର୍ଘଟଣା ପାଇଁ ଦାୟୀ ବ୍ୟକ୍ତି ମଧ୍ୟ ଚିହ୍ନଟ ହୋଇଛନ୍ତି । ଆଜି ପୁଣି ଦୁର୍ଘଟଣାସ୍ଥଳକୁ ପରିଦର୍ଶନ କରିଛନ୍ତି ଅଶ୍ୱିନୀ ।
ପୁନରୁଦ୍ଧାର କାମ ତାଦାରଖ କରିଛନ୍ତି । ଆଜି ସୁଦ୍ଧା ଗୋଟିଏ ଟ୍ରାକ୍ ପ୍ରସ୍ତୁତ ହୋଇଯିବ, ବିଦ୍ୟୁତୀକରଣ କାମ ଜୋରସୋରରେ ଚାଲିଛି । ବୁଧବାର ସକାଳ ସୁଦ୍ଧା ଚଳାଚଳ ସ୍ୱାଭାବିକ ହୋଇଯିବ । ସେପଟେ ଟ୍ରାକରୁ ଉଠିଲା ୨୧ ବଗି । ଦୁର୍ଘଟଣାଗ୍ରସ୍ତ ସମସ୍ତ ବଗିକୁ ଟ୍ରାକରୁ ଉଠାଯାଇଛି । ଟ୍ରେନ୍ ଚଳାଚଳ ସ୍ୱାଭାବିକ କରିବାକୁ ଉଦ୍ୟମ ଜାରି ରହିଛି । ଚାଲିଛି ବିଦ୍ୟୁତ୍ ଖୁଣ୍ଟ ଓ ଲାଇନ ମରାମତି କାମ । ରାତି ସାରା ମରାମତି କାମରେ ଲାଗିଛନ୍ତି କର୍ମଚାରୀ । ଯୁଦ୍ଧକାଳୀନ ଭିତ୍ତିରେ ଚାଲିଛି ବିଦ୍ୟୁତଖୁଣ୍ଟି ଓ ଟ୍ରାକ ମରାମତି । ଡାଉନ ଲାଇନ ତୁଳନାରେ ଅଧିକ କ୍ଷତିଗ୍ରସ୍ତ ହୋଇଛି ଅପଲାଇନ୍ ।
