ପଶ୍ଚିମବଙ୍ଗ ହିଂସାର ସ୍ଥିତି ସମୀକ୍ଷା କରିବ କେନ୍ଦ୍ରୀୟ ଟିମ
କୋଲକାତା(ବଡ଼ ଖବର ବ୍ୟୁରୋ): ପଶ୍ଚମବଙ୍ଗରେ ହୋଇଥିବା ନିର୍ବାଚନ ପରବର୍ତ୍ତୀ ସ୍ଥିତିର ସମୀକ୍ଷା କରିବେ ୪ଜଣିଆ କେନ୍ଦ୍ରୀୟ ଟିମ । ନିର୍ବାଚନ ଫଳାଫଳ ଘୋଷଣା ପରେ ବଙ୍ଗରେ ହୋଇଥିବା ହଂସାରେ ଅନେକ ରାଜନୈତିକ କର୍ମୀମାନେ ଆହତ ହୋଇଥିଲେ । ବିଶେଷ କରି ବିଜେପି କର୍ମୀ ମାନେ ହିଂସାର ଶିକାର ହୋଇଥିଲେ । ଏନେଇ ୫ତାରିଖରେ ବିଜେପି ପକ୍ଷରୁ ଦେଶବ୍ୟାପି ପ୍ରଦର୍ଶନ ମଧ୍ୟ କରାଯାଇଥିଲା । ତେବେ ପଶ୍ଚିମବଙ୍ଗରେ ହୋଇଥିବା ହିଂସାର ସବିଶେଷ ତଥ୍ୟ ପ୍ରଦାନ କରିବାକୁ ପଶ୍ଚିମବଙ୍ଗ ସରକାରଙ୍କୁ ଦୁଇ ଥର ଚିଠି ଲେଖିଥିଲେ କେନ୍ଦ୍ର ଗୃହମନ୍ତ୍ରାଳୟ ।
ରାଜ୍ୟ ସରକାର ତଥ୍ୟ ପ୍ରଦାନ ନ କଲେ ଏହାର ଅନୁଧ୍ୟାନ କେନ୍ଦ୍ରୀୟ ଟିମ କରିବ ବୋଲି ମଧ୍ୟ ସତର୍କ କରାଇଥଲେ କେନ୍ଦ୍ର ସରକାର । ତେବେ ସମୟ ନଷ୍ଟ ନକରି ଏହାର ସମ୍ପୂର୍ଣ୍ଣ ତଥ୍ୟ ପ୍ରଦାନ କରିବାକୁ ମଧ୍ୟ ଏହି ଚିଠିରେ କୁହାଯାଇଥିଲା । କିନ୍ତୁ ରାଜ୍ୟ ସରକାର ଏନେଇ କୌଣସି ପଦକ୍ଷେପ ଗ୍ରହଣ ନକରିବାରୁ ଆଜି କେନ୍ଦ୍ର ଗୃହ ବ୍ୟାପାର ମନ୍ତ୍ରାଳୟର ଜଣେ ଅତିରିକ୍ତ ସଚିବସ୍ତରୀୟ ଅଧିକାରୀଙ୍କ ନେତୃତ୍ୱରେ ଚାରିଜଣିଆ ଟିମ ଏହାର ଯାଞ୍ଚ କରିବାକୁ ପଶ୍ଚିମବଙ୍ଗକୁ ଯାତ୍ରା କରିଛନ୍ତି ।