ପୁରୁଣା ବଜେଟ ପଢିଲେ ମୁଖ୍ୟମନ୍ତ୍ରୀ
ରାଜସ୍ଥାନ (ବଡ଼ ଖବର ବ୍ୟୁରୋ): ରାଜସ୍ଥାନ ବିଧାନସଭାରେ ଶୁକ୍ରବାର ବଜେଟ ଉପସ୍ଥାପନ ହୋଇଛି। ବଜେଟ୍ ଉପସ୍ଥାପନ କରୁଥିବା ମୁଖ୍ୟମନ୍ତ୍ରୀ ଅଶୋକ ଗେହଲଟଙ୍କୁ ଏକ ଅପ୍ରୀତିକର ପରିସ୍ଥିତିର ସାମ୍ନା କରିବାକୁ ପଡିଛି। ଏହାକୁ ନେଇ ଗୃହରେ ପ୍ରବଳ ହଙ୍ଗାମା ଦେଖିବାକୁ ମିଳିଥିଲା । ବାଚସ୍ପତି ହଟ୍ଟଗୋଳକୁ ଦେଖି ଗୃହ କାର୍ଯ୍ୟକୁ ସ୍ଥଗିତ ରଖିଛନ୍ତି ।ବଜେଟ ପଢିବା ସମୟରେ ଅଶୋକ ଗେହଲଟ ପୁରୁଣା ବଜେଟର କିଛି ଯୋଜନାକୁ ପୁଣି ଥରେ ଉପସ୍ଥାପନା କରିଥିଲେ ।
କେବଳ ଏତିକି ନୁହେଁ ଏଥିରେ ସହରୀ ବିକାଶ ଯୋଜନା ଯାହା ଗତ ବର୍ଷ ଲାଗୁ ହୋଇଥିଲା ତାହା ମଧ୍ୟ ରହିଥିଲା । ତାକୁ ମଧ୍ୟ ଚଳିତ ବଜେଟରେ ପୁଣି ଥରେ ଉପସ୍ଥାପନ କରାଯାଇଥିଲା । ଏହା ଦେଖିବା ପରେ ସେଠାରେ ଉପସ୍ଥିତ ଥିବା ମନ୍ତ୍ରୀ ମହେଶ ଯୋଶୀ ତାଙ୍କୁ ଏ ବାବଦରେ ଅବଗତ କରାଇଥିଲେ । ଏହା ପରେ ମୁଖ୍ୟମନ୍ତ୍ରୀ ବଜେଟ ଭାଷଣକୁ ବନ୍ଦ କରିଥିଲେ। ଅନ୍ୟପକ୍ଷରେ ମୁଖ୍ୟମନ୍ତ୍ରୀଙ୍କ ଏହି ଭୁଲକୁ ଅବହେଳା ପ୍ରସଙ୍ଗ କରି ବିରୋଧୀଦଳ ଗୃହରେ ହଙ୍ଗାମା ଆରମ୍ଭ କରିଥିଲେ। ପରେ ମୁଖ୍ୟମନ୍ତ୍ରୀ ତାଙ୍କ ଭୁଲ ବୁଝିପାରି କ୍ଷମା ମାଗିଥିଲେ। ଏହା ପରେ ମଧ୍ୟ ବିରୋଧୀ ଶାନ୍ତ ପଡି ନ ଥିଲେ। ବିରୋଧୀ ଦଳର ଆଭିମୁଖ୍ୟ ଦେଖି ବାଚସ୍ପତି ସମସ୍ତଙ୍କୁ ଶାନ୍ତି ବଜାୟ ରଖିବାକୁ ନିବେଦନ କରିଥିଲେ।