ଆଉ କିଛି ସମୟର ଅପେକ୍ଷା.. ଆରମ୍ଭ ହେବ କାଉଣ୍ଟ

ନୂଆଦିଲ୍ଲୀ (ବଡ଼ ଖବର ବ୍ୟୁରୋ): ଆଉ କିଛି ସମୟରେ ଆସିବ ୪ ରାଜ୍ୟରେ ବିଧାନସଭା ନିର୍ବାଚନର ଫଳାଫଳ। ମଧ୍ୟପ୍ରଦେଶ, ରାଜସ୍ଥାନ, ଛତିଶଗଡ଼ ଓ ତେଲେଙ୍ଗାନା ଭୋଟ୍ ର ଫଳାଫଳ ଆଜି ପ୍ରକାଶ ପାଇବ। ଆଉ ମାତ୍ର କିଛି ସମୟର ଅପେକ୍ଷା। ସକାଳ ୮ଟାରୁ ଆରମ୍ଭ ହେବ ଗଣତି । ଏହାପୂର୍ବରୁ ନିର୍ବାଚନୀ ରାଜ୍ୟରେ ଜୋରଦାର ଆଲୋଡ଼ନ ସୃଷ୍ଟି ହୋଇଛି। ନିର୍ବାଚନ ଫଳାଫଳ ପୂର୍ବରୁ ନେତାଙ୍କ ବୈଠକ ମଧ୍ୟ ଆରମ୍ଭ ହୋଇଛି। ନେତାମାନେ ସେମାନଙ୍କର ନିଜସ୍ୱ ବିଜୟ ଦାବି କରୁଛନ୍ତି। ମଧ୍ୟପ୍ରଦେଶ, ଛତିଶଗଡ ଏବଂ ରାଜସ୍ଥାନରେ ଉଭୟ କଂଗ୍ରେସ ଏବଂ ବିଜେପି ସମ୍ପୂର୍ଣ୍ଣ ସଂଖ୍ୟାଗରିଷ୍ଠତା ହାସଲ କରିବାକୁ ଦାବି କରୁଛନ୍ତି।

ଏଥି ସହିତ, ବିଆରଏସ ମଧ୍ୟ ତେଲେଙ୍ଗାନାରେ ଦାବି କରୁଛି ସେମାନେ ସରକାର ଗଠନ କରିବାକୁ ଯାଉଛନ୍ତି। ତେବେ ଏକଜିଟ ପୋଲରେ ମୁଖ୍ୟମନ୍ତ୍ରୀ କେ ଚନ୍ଦ୍ରଶେଖର ରାଓ(କେସିଆର)ଙ୍କ ଦଳ ସଂଖ୍ୟାଗରିଷ୍ଠତା ଛୁଇଁବାକୁ ସକ୍ଷମ ନୁହେଁ ବୋଲି ଦର୍ଶାଯାଇଛି। ଫଳାଫଳର ପୂର୍ବରୁ ନେତାମାନେ ମନ୍ଦିର ମୁହାଁ ହେବା ସହିତ ଲୋକଙ୍କୁ ଭେଟିବାର ପ୍ରକ୍ରିୟା ମଧ୍ୟ ଜାରି ରଖିଛନ୍ତି। ସେପଟେ କଡ଼ା ସୁରକ୍ଷା ଭିତରେ ୪ ରାଜ୍ୟରେ ଗଣତି ଆରମ୍ଭ ହେବାକୁ ଯାଉଛି । ସବୁ ନେତାଙ୍କ ହାର୍ଟବିଟ ବଢିବାରେ ଲାଗିଛି । କିଏ ଜିତିବ? କାହାର ପଲା ଭାରି ରହିବ ? ସମସ୍ତଙ୍କ ମନରେ ଆଲୋଡନ ସୃଷ୍ଟି ହେଉଛି ।