ଭୋଟରଙ୍କୁ ତରଭୁଜ, ବୁଥ ଜଗିଲା ଡ୍ରୋନ

ଝାରସୁଗୁଡ଼ା(ବଡ଼ ଖବର ବ୍ୟୁରୋ): ଭୋଟ ଦେଇଛି ଝାରସୁଗୁଡ଼ା । ପ୍ରାର୍ଥୀଙ୍କ ଭାଗ୍ୟ ପରୀକ୍ଷା କରିଛନ୍ତି ଭୋଟର । ତେବେ ଆଜି ଦିନ ସାରା ପ୍ରବଳ ତାତି ଦେଖିବାକୁ ମିଳିଥିଲା । ଗୋଟଏ ପଟେ ନିର୍ବାଚନ ତାତି ଅନ୍ୟପଟେ ପ୍ରବଳ ଖରା ଭୋଟରଙ୍କୁ ଅସ୍ତବ୍ୟସ୍ତ କରିଥିଲା । ତଥାପି ତାତିକୁ ଖାତିର ନକରି ବୁଥରେ ଧାଡ଼ିରେ ଛିଡ଼ା ହୋଇ ଗଣତନ୍ତ୍ରର ମହାପର୍ବରେ ସାମିଲ ହୋଇଥିଲେ ଭୋଟର । ମହିଳା, ବୟସ୍କ ଏମାନେ ବି ଖରାରେ ବାହାରି ନିଜର ମତାଧିକାର ସାବ୍ୟସ୍ତ କରିଥିଲେ । ତେବେ ଭୋଟରଙ୍କ ଖରା କଷ୍ଟକୁ କମ କରିବାକୁ କିଛି ବୁଥରେ ନିଆରା ବ୍ୟବସ୍ଥା ହୋଇଥିଲା । ଭୋଟରଙ୍କୁ ତରଭୁଜ ବାଣ୍ଟିଥିଲେ ।

ଏହା ସହ ଛାଇ କରିବାକୁ ଟେଣ୍ଟ ବ୍ୟବସ୍ଥା କରିଥିଲା ପ୍ରଶାସନ । ବୁଥରେ ଥଣ୍ଡା ପାନୀୟ ଜଳ ବ୍ୟବସ୍ଥା ରହିଥିଲା । ଯେଉଁଠି ଲମ୍ବା ଧାଡ଼ି ହେଉଥିଲା ସେଠି ପାଣି ସିଞ୍ଚନ କରାଯାଉଥିଲା । ବୁଥରେ ଶାନ୍ତିଶୃଙ୍ଖଳା ରଖିବା ପାଇଁ ସୁରକ୍ଷାକର୍ମୀମାନେ ନିୟୋଜିତ ହୋଇଥିଲେ । ସମ୍ବେଦନଶୀଳ ଓ ଅତି ସମ୍ବେଦନଶୀଳ ବୁଥ ଚିହ୍ନଟ ହୋଇ ନିର୍ବାଚନ ଅଧିକାରୀଙ୍କ ପକ୍ଷରୁ ବ୍ୟାପକ ସୁରକ୍ଷା ବ୍ୟବସ୍ଥା କରାଯାଇଥିଲା । କିଛି ବୁଥରେ ସିସିଟିଭି ଲାଗିଥିଲା । ଆଉ କିଛି ବୁଥକୁ ଜଗିଥିଲା ଡ୍ରୋନ । ମତଦାନ କେନ୍ଦ୍ରକୁ ଡ୍ରୋନ କ୍ୟାମେରା ଲଗାଇ ନଜର ରଖାଯାଇଥିଲା ।