ସାନଭାଇର କଟୁରୀ ଚୋଟରେ ଗଲା ବଡ଼ଭାଇର ଜୀବନ

କେନ୍ଦ୍ରାପଡ଼ା (ବଡ଼ ଖବର ବ୍ୟୁରୋ):  ଜମିଜମା ବିବାଦରୁ ବଡଭାଇକୁ ହାଣିଲା ସାନଭାଇ । ବଡ଼ଭାଇ ମୃତ । ଏଭଳି ଅଭାବନୀୟ ଘଟଣା ଘଟିଛି ପଟ୍ଟାମୁଣ୍ଡାଇ ପୌରାଞ୍ଚଳ ୧ନଂ ୱାର୍ଡ ଷଣ୍ଢପଲ୍ଲୀ ଗ୍ରାମରେ । ମୃତକ ହେଲେ ଅନୁପମ ବେହେରା । ଜମିବାଡି ବିବାଦ ଓ ପାଣି ପାଇପ ଲଗାଇବାକୁ କେନ୍ଦ୍ର କରି ଉଭୟ ସାନଭାଇ ସନାତନ ବେହେରା ଓ ଅନୁପମ ବେହେରାଙ୍କ ମଧ୍ୟରେ ବଚସା ହୋଇଥିଲା । ସାନଭାଇ ସନାତନ ଉତ୍ୟକ୍ତ ହୋଇ ଏକ ଧାରୁଆ କଟୁରୀରେ ବଡ଼ଭାଇକୁ ଆଘାତ କରିଥିଲା । ଯାହା ଫଳରେ ବଡଭାଇ ଅନୁପମ ଗୁରୁତର ହୋଇ ତଳେ ପଡି ଯାଇଥିଲେ ।

ସ୍ଥାନୀୟ ଲୋକେ ମୁମୁର୍ଷୁ ଅବସ୍ଥାରେ ଅନୁପମକୁ ପଟ୍ଟାମୁଣ୍ଡାଇ ସ୍ୱାସ୍ଥ୍ୟକେନ୍ଦ୍ରକୁ ଆଣିଥିଲେ । ସେଠାରେ ଡାକ୍ତର ଅନୁପମକୁ ମୃତ ଘୋଷଣା କରିଥିଲେ । ଉଭୟ ଭାଇଙ୍କ ଦୀର୍ଘ ଦିନ ଧରି ଜମିଜମା ବିବାଦକୁ କେନ୍ଦ୍ରକରି ତିକ୍ତତା ଲାଗିରହିଥିଲା । ଆଜି ସକାଳେ ପାଣି ପାଇପ ପକାଇବାକୁ ନେଇ ବଚସା ହୋଇଥିଲା । ଏଥିରେ ଉତ୍ୟକ୍ତ ହୋଇ ସାନଭାଇ ସନାତନ ବଡଭାଇକୁ ଏକ କଟୁରୀ ସାହାଯ୍ୟରେ ଆକ୍ରମଣ କରିଥିଲା । ଖବର ପାଇ ଘଟଣାସ୍ଥଳରେ ପୋଲିସ ପହଞ୍ଚି ତଦନ୍ତ ଜାରି ରଖିଥିବା ବେଳେ ଅଭିଯୁକ୍ତ ସାନଭାଇ ସନାତନ ଫେରାର ଥିବା ଜଣାପଡିଛି ।