ଶ୍ରୀମନ୍ଦିରରେ ପଟିଦିଅଁ ବିଜେ

ପୁରୀ (ବଡ଼ ଖବର ବ୍ୟୁରୋ): ଏତେ ଗାଧୋଇଲେ ଯେ ଏବେ ଦେହରେ ଖଇ ଫୁଟୁଛି ।  ଜ୍ୱରରେ କମ୍ପୁଛନ୍ତି ମହାପ୍ରଭୁ । ସ୍ନାନମଣ୍ଡପରେ ୧୦୮ଗରା ସୁନା କୂଅ ଜଳ ସ୍ନାନ ପରେ ଜ୍ୱରରେ ପୀଡ଼ିତ ଦାରୁଦିଅଁ । ଏଣୁ ଜ୍ୱରରୁ ମୁକ୍ତି ପାଇଁ ୧୩ ଦିନ ପର୍ଯ୍ୟନ୍ତ ଚାଲିବ ଠାକୁରଙ୍କ ଗୁପ୍ତ ନୀତି । ପୀଡ଼ିତଙ୍କୁ ଯେପରି ପଥି, ପାଚନ ଏବଂ ଔଷଧ ଲୋଡ଼ା ହୁଏ, ଠିକ୍ ସେଭଳି ଶ୍ରୀବିଗ୍ରହଙ୍କ ସେବା । ଦଇତାପତି ସେବକମାନେ ସାମୂହିକ ଭାବେ ଠାକୁରଙ୍କ ଏହି ଗୁପ୍ତ ସେବା ଆରମ୍ଭ କରିଛନ୍ତି ।

ଏହି ସମୟରେ ଠାକୁରଙ୍କୁ ଦର୍ଶନ ମନା । ଅନବସର ସମୟରେ ପୂଜା ପାଇବେ ପଟିଦିଅଁ । ଶନିବାର ବିଳମ୍ବିତ ରାତିରେ ଶ୍ରୀମନ୍ଦିରକୁ ବିଜେ କରିଛନ୍ତି ପଟିଦିଅଁ । ଶ୍ରୀଜଗନ୍ନାଥଙ୍କ ସ୍ଥାନରେ ନାରାୟଣ, ବଳଭଦ୍ରଙ୍କ ସ୍ଥାନରେ ଅନନ୍ତ ବାସୁଦେବ ଓ ଦେବୀ ସୁଭଦ୍ରାଙ୍କ ସ୍ଥାନରେ ଭୁବନେଶ୍ୱରୀ ପଟିଦିଅଁ ଭାବେ ପୂଜା ପାଇବେ । ଅନ୍ୟପଟେ ବିଳମ୍ବିତ ରାତିରେ ବାହୁଡ଼ା ପହଣ୍ଡି ଶେଷ ପରେ ଶ୍ରୀଜିଉଙ୍କ ସୁନାଚିତା ଓ ରାହୁଲେଖା ମଇଲମ ନୀତି ଅନୁଷ୍ଠିତ ହୋଇଛି । ଅନ୍ୟପଟେ ଶ୍ରୀଜିଉ ଅଣବସର ଘରେ ଥିବାରୁ ବ୍ରହ୍ମଗିରି ଅଲାରନାଥ ପୀଠରେ ଆରମ୍ଭ ହୋଇଛି ଦର୍ଶନ । ଭୋରରୁ ଅଲାରନାଥ ପୀଠରେ ଦ୍ୱାର ଫିଟା, ମଙ୍ଗଳ ଆଳତି ଓ ତଡ଼ପଲାଗି ନୀତି ପରେ ସକାଳ ୬ଟାରୁ ସାଧାରଣ ଦର୍ଶନ ଆରମ୍ଭ ହୋଇଛି ।

ସକାଳୁ ସକାଳୁ ପ୍ରଭୁ ଅଲାରନାଥଙ୍କୁ ଦର୍ଶନ ପାଇଁ ପ୍ରବଳ ଭିଡ଼ ଲାଗିଛି । ଅଲାରନାଥ ପୀଠରେ ଦର୍ଶନ ଚତୁର୍ଦ୍ଧାମୂର୍ତ୍ତିଙ୍କ ନବ ଯୌବନ ଦର୍ଶନ ପର୍ୟ୍ୟନ୍ତ ଚାଲିବ । ବିଶ୍ୱାସ ରହିଛି ଅଣବସର ସମୟରେ ଅଲାରନାଥଙ୍କୁ ଦର୍ଶନ କଲେ କୋଟି ପୂଣ୍ୟ ମିଳିଥାଏ । ସ୍ନାନ ଯାତ୍ରାରେ ଅତ୍ୟଧିକ ସ୍ନାନ କରି ପ୍ରଭୁ ଜ୍ୱରରେ ପଡ଼ି ଅଣବସରରେ ୧୩ ଦିନ ଧରି ରହିବେ । ଏଣୁ ଶ୍ରୀମନ୍ଦିରର ରତ୍ନ ସିଂହାସନରେ ତିନି ଠାକୁର ଭକ୍ତଙ୍କୁ ଦର୍ଶନ ଦିଅନ୍ତି ନାହିଁ ।