ସାଇବର ଠକଙ୍କ ନୂଆ ତରିକା

ଭୁବନେଶ୍ୱର(ବଡ଼ ଖବର ବ୍ୟୁରୋ): ପାର୍ସଲ ନାଁରେ ଲୋକଙ୍କୁ ଲୁଟୁଛନ୍ତି ସାଇବର ଠକ । ସାଇବର ଠକଙ୍କୁ ନେଇ ସତର୍କ ସୂଚନା ଜାରି କରିଛି ଓଡିଶା ପୋଲିସ ସଂସ୍ଥା । ଓଡିଶା ପୋଲିସ ସଂସ୍ଥା ପକ୍ଷରୁ ଏକ ପୋଷ୍ଟ ସେୟାର କରାଯାଇଛି ଯେଉଁଥିରେ ଦର୍ଶାଯାଇଛି ଯେ ସାଇବର ଠକଙ୍କ ନୂଆ ତରିକା । ପାର୍ସଲ ନାଁରେ ଲୋକଙ୍କୁ ଲୁଟୁଛନ୍ତି ।

ସେଥିପାଇଁ ସାଇବର ଠକଙ୍କ ଠାରୁ ସତର୍କ ରହିବାକୁ ପରାମର୍ଶ ଦେଇ ଓଡିଶା ପୋଲିସ ତରଫରୁ କୁହାଯାଇଛି ଯେ କୌଣସି କୋରିଅର କମ୍ପାନୀ କଷ୍ଟମ ଅଧିକାରୀଙ୍କ ନାଁ କହି ପଇସା ମାଗିଲେ ଦିଅନ୍ତୁ ନାହିଁ । ସଂପୃକ୍ତ ବ୍ୟକ୍ତିଙ୍କ କଥାରେ ଭୟଭୀତ ହୁଅନ୍ତୁ ନାହିଁ । ନିଜକୁ ଏନସିବି, ସିବିଆଇ ପୋଲିସ କିମ୍ବା ଇଡି ଅଫିସର ବୋଲି ପରିଚୟ ଦେଇ ଫୋନ କରିଥିବା ବ୍ୟକ୍ତିଙ୍କ ସମ୍ପର୍କରେ ସତ୍ୟାସତ୍ୟ ଯାଞ୍ଚ କରନ୍ତୁ ।

କାରଣ ଆପଣଙ୍କୁ ଭୟଭୀତ କରାଇ ଟଙ୍କା ଲୁଟ କରିବା ସେମାନଙ୍କର ମୁଖ୍ୟ ଉଦ୍ଦେଶ୍ୟ ଥାଏ । ଏଭଳି ଫୋନ ଆସିଲେ ତୁରନ୍ତ ସାଇବର କ୍ରାଇମ ଥାନାରେ ନଚେତ ସ୍ଥାନୀୟ ପୋଲିସ ସହ ଯୋଗଯୋଗ କରନ୍ତୁ । ଓଡିଶା ପୋଲିସ ପକ୍ଷରୁ ଏଭଳି ସଚେତନତା ଜାରି କରାଯାଇଛି ।